June 11, 2024 (Rauthla) : CYLA chuan thuchhuah siamin Myanmar ramchhung, Rakhine State-a bungraw phurh luh thin, May 25, 2024 atanga Central YLA ngenna anga tihtawp lailawk chu CYLA leh United League of Arakan (ULA) te inbiakremna angin June 11, 2024 (6:00pm) atangin hawn/kal remtih a ni.
CYLA chuan tunhnaia Lawngtlai District leh hmun dang hrang hrang atanga Myanmar ramchhung, Rakhine State-a bungraw phurh luh thin chu harsatna leh buaina lian zawk a thlen palh theih avangin May 25, 2024 atangin CYLA ngenna angin tihtawp lailawk a ni a. Amaherawhchu helai hmun hi tunah chuan ralmuang ta deuha hriat a nih avangin leh United League of Arakan (ULA) leh CYLA ten inbiakremna an neih tak avangin June 11, 2024 (6:00pm) atangin hawn/kal remtih leh tawh a ni, tiin hriattirna an chhuah.
CYLA chuan he insumdawntawnna chungchang hi ngaihven leh bawhzui reng ngai thil a la nih rih avangin Study Team dinin hma a la chho zel dawn tih an sawi a. CYLA chuan he insumdawntawnna chungchanga thuthar emaw hmalakna thar emaw a lo awm a nih pawhin ram mipuite tan vek a ni tih hriaa Central YLA thu ngaichang thiam turin an ngen tih an sawi bawk.
Post a Comment