Mizoram Police bultuminin Walk For Drug Free Mizoram 2024, buatsaih a ni; Sorkarin drugs dona kawngah ngaihtuahna leh hun a seng nasa - CM

June 1, 2024 : Tukin khan Mizoram Police bultuminin Walk For Drug Free Mizoram 2024, buatsaih a ni a; Zing dar 7 ah Chanmari kawn atangin Chief Minister Pu Lalduhoma’n he ‘walk’ hi a vailiam a ni.

Chief Minister chuan, ruihhlo in ram leh hnam a tihchhiat nasat tawh zia sawiin; Sorkarin drugs dona kawnga ngaihtuahna leh hun a sen nasat tawh thu a tarlang a. Chak zawka a dona lam kalpui a nih theih nan, Ruihhlo Do Core Committee te tuai tharin, Excise & Narcotics department leh Social Welfare mawhphurhna te tarlangin, fel taka hmalak dan tur an thliar thu a sawi a; Central YMA kutah Sorkar a innghat thuk hle a ni, a ti bawk.

Home Minister, Pu K. Sangdanga pawhin, ruihhlo hi tihbo vek theih nilo mah se, a tih tlem kawngah ram mipuite rilru hmunkhat pu a hmalakpuiah a sawm a. Pu Lalnghinglova Hmar, Excise Minister pawhin ruihhlo do a tulzia leh mipuite tanrual a pawimawhna te sawiin hun a hmang bawk. He hunah hian Chief Minister chuan PHQ buatsaih Higher Secondary School level painting competition lawmman semin; Home Minister-in High School Level Painting Competition lawmman a sem bawk a ni.

Drugs Free Walk kharna inkhawm hi Anil Shukla, DGP Mizoram chuan a kaihruai a, Pu Lalbiakthanga Khiangte, IGP-in lawmthu sawiin hun a khar a; He Walk ah hian Minister Hrang hrang, MLA te bakah Chief Secretary Dr. Renu Sharma leh official pawimawh thahnem tak an tel a ni.