May 21, 2024 (Rauthla) : Vawiin khan MJA Lawngtlai District te chuan an Vice President Pu H. Lalrinmawia hoin Pu C. Lalmuanthanga, CEM, LADC an hmu a, CEM's Relief Fund atan Rs. 5,000 an chhungluh bakah Lawngtlai chanchinbu leh chanchinbu mite hmasawnna tura pawimawhte sawihoin, LADC Information Department tihchangtlunna tur pawimawh rawtna an neih te an thlen.
Pu C. Lalmuanthanga chuan MJA Lawngtlai District-in CEM's Relief Fund atana pawisa an pe chu lawmawm a tih thu a sawi a, CEM a nih hnua CEM's Relief Fund a dawn hmasak ber a nih thu a sawi a, tangkai taka hman a nih tur thu a sawi. Journalist te chu mipui khalh ngiltu, mipuite sukthlek tidanglam thei an nih thu sawiin, sorkar nen thawhho tlan a, inngheng renga awm a tul thu a sawi.
CEM chuan LADC sorkar tharah hmalakna tur tam tak a awm tih sawiin, revenue lakluh dan kawngah hmasawnna thar chhawpchhuah tum a ni, a ti a. LADC a hruaitu hmasate hmalakna chhunzawm zel chungin LADC in hmel thar a hmuh ngei tur thu a sawi bawk.
MJA Lawngtlai District hruaitute chuan MJA Lawngtlai District pension atan hman tur pawisa an dah sak thin chu lawmawm an tih thu leh hei hi tangkai taka hman mek a nih thu CEM hi an hrilh a, pawisa tam zawk dah sak turin an ngen bawk. LAD a Information & Public Relation Department pawh tilian a, thawktu pawh dah belh a, hmanrua pawh tun aia thuam that a tul thu an sawi a. LADC website pawh mumal taka a kal chhoh avanga lawmthu an sawi bakah hei aia hmasawnna tur la awm theiah tan lak a ngaih thu an sawi bawk.
CEM chuan MJA Lawngtlai District te ngenna hi tihlawhtlin nghal theihte a tihlawhtling nghal a, la bawhzui ngai awm te chu chak taka hma a lo lakpui tur thu a sawi.
Post a Comment