May 21, 2024 (Rauthla) : 3-Chhotapansury bial atanga MDC a thlan tlin Dg. Supreme Raj Chakma chu vawiin khan Executive Member of the 11th Chakma Autonomous District Council atan lakluh a ni.

Executive Member atana Dg. Supreme Raj Chakma lakluh inkhawm Arts & Culture Hall, Kamalanagar-a neih hi CADC-a Executive Secretary Pu Pronit Bikash Chakma chuan kaihruaiin, EM atana Pu Supreme Raj Chakma ruat a nihna Mizoram sawrkar notification a chhiar chhuak a. Hemi hnu hian Additional DC Pi B. Malsawmtluangi chuan Pu Supreme Raj Chakma chu thu tiamtirin, 11th CADC-a EM ni turin a la lut nghal a ni.

Vawiina EM thar lak luh inkhawmah hian Chief Executive Member (CEM) & Tuichawng bialtu MLA Pu Rasik Mohan Chakma bakah, CADC-a member-te leh official pawimawhte an tel a. CEM Pu Rasik Mohan Chakma chuan thu a sawi bawk.

Pu Supreme Raj Chakma hi 11th CADC Inthlanpui 2023-ah khan Indian National Congress (INC) ticket-in Chhotapansury bial aṭangin MDC atan thlan tlin niin, a hnuah MNF party a zawm a. CADC CEM-in EM atana a rawtna chu May ni 7, 2024 khan Mizoram Governor chuan lo pawmpuiin, vawiin khan EM atan hian lak luh a ni ta a ni. University of Delhi atangin Law Degree a zova, politic a luh hma hian Lawyer hna a thawk.

CADC-ah hian elected MDC seat 20 a awm a. Tunah hian 11th CADC-ah EM pasarih awmin, CEM hovin Executive Committee-ah member pariat an awm mek a ni.

Post a Comment

Powered by Blogger.