May 11, 2024 (Rauthla) : Hun engemawchen LADC sorkara Chief Executive Member a awm tawh loh hnuah May 12, 2024 (Thawhlehni) hian MNF leh INC sorkar intawma CEM tur Pu C. Lalmuanthanga chu LADC Hall-ah CEM atan lakluh a ni dawn.
Tarlan tawngin LADC a MNF sorkara MDC 13 te chuan CEM nilai Pu V. Zirsanga an rintawk loh avangin an rintawk loh thu leh thlawptu member a ngah tawk loh thu leh floor test neih sak tura an ngenna chu Larsap hnenah kumin February ni 18 khan an thlen a. March 7, 2024 a Floor Test nei tura tih niin, hemi hma lawk hian CEM nilai Pu V. Zirsanga chu CEM, LADC atangin a bang.
Chief Executive Member Pu V. Zirsanga'n March 7, 2024 a banna a thehluh hnuah LADC ah sorkarna siam thei an awm loh avangin Mizoram Governor chuan kumin March ni 15 khan LADC enkawltu tur (Caretaker) atan Lawngtlai DC a ruat a. Hun engemawchen LADC ah sorkar mumal a awm loh hnuah MNF MDC 12 leh INC MDC 1 te chuan sorkar intawm siam turin inremna an nei a, United Legislature Party an din a, leader atan Pu C. Lalmuanthanga, S. Lungpher bial atanga Congress ticket-a thlan tlin chu thlan a ni. ULP hian May 1, 2024 khan LADC ah sorkarna an siam thei tih Governor hnenah Caretaker, Lawngtlai DC kaltlangin an thlen a, he thu kalzelah hian Chief Executive Member atan Governor in Pu C. Lalmuanthanga chu May 7, 2024 a a pawmna chu May 9, 2024 khan tihchhuah a ni ta a ni.
Chief Executive Member thar tur hi Lawngtlai DC in rinawmna thu tiamtirin a lalut ang a, Governor ruahmanna siam lawk angin CEM thar rintawkna hi May 20, 2024 ah LADC Session ah neih a ni ang.
Post a Comment