Lawngtlaiah hri danna pek chungchangah Lawngtlai District Bawrhsap hoin DTFI an ṭhu khawm

May 17, 2024, Lawngtlai : Lawngtlai District Task Force on Immunisation (DTFI) chu an Chairman, Lawngtlai District Bawrhsap Pu Cheemala Siva Gopal Reddy hovin vawiin DC Conference Hall-ah an ṭhu khawm a. Lawngtlai District-a hri danna pek dan dinhmun leh ṭha zawka hri danna pek kalpui theih dan tur an sawi ho.

Chairman Pu Cheemala Siva Gopal Reddy chuan Lawngtlai District-ah hriselnain hma a sawn zel theih nan hri danna pek chungchangah ṭan lak lehzual a pawimawh tih sawiin, District chhung khaw kilkhawr bera mi pawhin hri danna an lak vek theih nan sawrkar department hrang hrangte, chanchinbu mite leh tlawmngai pawlte'n mahni theihna zawn ṭheuhvah theih tawp chhuah tlang a, thawh ho a pawimawh, a ti a. Hri danna lak ṭhat chu naupang ṭhan chhoh zelna atan a pawimawh avangin nu leh pate'n ngaih pawimawh a ṭul tiin, hri danna lak pawimawhna te, damdawi in ngeia nau neih ṭhatna leh chaw ṭha pawimawhnate chu nasa zawka tlangaupui turin kal khawmte chu a chah a. Malaria awm hun a nih chhoh leh dawn avangin damdawia chiah thosilen zar ngai pawimawh turin District mipuite a chah bawk.

He hunah hian DTFI Member Secretary, District Immunisation Officer Dr S. Thaizi bakah, CMO office leh Lawngtlaia damdawi in hrang hrang ai awhte, WHO hnuaia thawktute, sawrkar department hrang hrang official-te, District MJA leh tlawmngai pawl ai awhte an tel a. World Health Organisation (WHO) hnuaia Surveillance Medical Officer Dr Lalhlimpuii chuan powerpoint presentation hmangin naupang hnena hri danna pek chungchanga Lawngtlai District dinhmun tlangpui leh hmasawn ngaihna lai te a tar lang a. Lawngtlai District chhungah nausenin kum 1 an tlin hmaa lak tur natna chi hrang chi nga laka invenna, Pentavalent vaccine la lo (zero doser) eng emaw zat an la awm ṭhin avangin ṭan lak lehzual a ngaih thu te sawiin, hma lak dan tur ruahmannate a tar lang bawk a. Member kal khawmte chuan hri danna pek chungchanga Lawngtlai District-a harsatna awmte leh ṭha zawk leh felfai zawka kalpui a nih theih nana rawtna hrang hrangte sawi ho zuiin, hmasawnna a awm theih nana hma lak dan tur an ruahman bawk.