Aizawl 18.03.2024 : Vanramchhuangi (Ruatfela Nu) chuan vawiin (18.3.2024) khan Anti Corruption Bureau (ACB)-ah Luangmual to Vaisam PMGSY kawng laih hna thawktu contractor leh Lunglei Road Division-II Lunglei, Mizorama a hotu lu berte lakah FIR a thehlut.
Vanramchhuangi chuan Luangmual to Vaisam PMGSY kawng laih mekah kawngsir tui luankawr (side drain) chhia video clip viral a hmuh thu tarlangin, 'A hmain he kawng laih mek chhe lutuk chungchang hi kan lo sawi fo tawh a, rilru a la nghal zar mai. Lungleia ka thianpain PMGSY suma Luangmual to Vaisam kawng laih mek RTI dan hmanga dilte pawh min rawn thawn. Hetiang a nih chuan Anti Corruption Bureau (ACB) a FIR theh luh tur a ni tiin thutlukna ka siam ta a ni,' a ti.
He kawng laih hnathawktu VRS Construction, Zonuam, Aizawl leh a viltu, Mizoram Public Work Department (MPWD) Lunglei Road Division-a a lu ber, Engineer-te'n mipui pawisa (public fund) ngeia mipui tam takin an chhawr tangkai tur, inkalpawhna kawng laih hna leh vil hna an thawhna kawngah, pawisa neitu mipui zahphahna chhete mah nei loin duhdah takin kawng an siam nia tarlangin, 'He kawng laih hna thawktu leh a viltu hian inang rengin ram mipui pawi an sawi,' tiin state meuh zah loa vantlang kawng laitute hi dan anga hre an nih ngei theih nan hmala turin a ngen.
Post a Comment