March 6, 2024 (Rauthla) : Power & Electricity Minister Pu F. Rodingliana chuan tun sorkarin Hydel project siam turin hmalak a tum tih sawiin, hmun thumah Hydel Project siam tumna a awm thu a sawi.
Vawiin Assembly Session-ah Pu F. Rodingliana chuan Ngopa bula Tuivai HP 150 Mega Watt, Lungleng khaw bula Tlawng HP 120 Mega Watt leh Sesawng bula Tuirini HP 24 Mega Watt chu te thawh a nih theih nan hmalak mek a nih thu a sawi a. Hmalak tumna hmasa ber sawi mai theih a ni lo tih sawiin, Hydel Project siam tura thil tul paiwmawh hrang hrangte thawhna tur sum leh paite hmuh hmasak apiangte thawh nghal zel a ni dawn tih a sawi bawk.
Lawngtlai West bialtu MLA Pu C. Ngunlianchunga'n 'engvanginnge Lunglei atanga Chhim lampang zawng hi khua a chhiat apianga kan thim ziah, a chhan min hrilh thei em? Siam tumna a awm em' tih a zawhna chu Power & Electricity Minister chuan tunah hian 132Kv line hi Hnahthial atang leh hmun hnih atanga hmalak tum mek a ni a, rawlkhawlhna neuh neuh a awm avangin sum awmsa pawh hman theih a ni lova, theihtawp chhuaha hmala turin department lamte pawhin ngaihtuahna an hmang, a ti.
Palak bialtu MLA Pu K. Hrahmo zawhna Chhimtuipui lui Kawlchaw khuah tum chu khuah belh tumna a awm em tih leh engvanga chawl ta nge a nih tih a zawhna chu Pu F. Rodingliana chuan Chhimtuipui khuah chungchang chu NEEPCO te nen agreement ziah tawh a nih thu leh tum anga thil a awm loh avangin an agreement chu tihtawp a nih thu a sawi a. A hmaa ruahmansa aia te leh samkhai tur ang zawka hmalak dan tur ngaihtuah mek a nih thu a sawi.
Post a Comment