March 18, 2024 : Vawiin chhun dar 12 khan PC Party President Pu Vanlalruata chuan Lok Sabha MP Inthlan lo awm tura PC Party candidate tur chu Rita Malsawmi (49) D/o LT Muana (L), Kolasib Venglai, tuna Laipuitlang, Aizawl-a khawsa mek anih thu Kolasib MJA Press Club, Kolasib-ah a puang.
Pu Vanlalruata chuan,
"Kan Candidate hi thlan tlin anih chuan Aizawl-ah MP Office a hawng dawn
a, MP zawng zawngin anmahni bial-a office an neih vekna tur Dan siam anih
theihnan hma a la dawn," tiin hei hi a hlawhtlin ngei an rin thu sawiin,
"Hemi avang ringawt pawh hian MP zawng zawngin role model-a an neih,
history bung thar siamtu a ni dawn a ni," tiin vote theuh turin mipui a
sawm a ni.
Rita Malsawmi
chuan Mizoram MP mai ni lovin Zofa zawng
zawng leh India ram kristian zawng zawng te tan MP a ni dawn tih a sawi a, Mizoram hmasawnna tur te, Zofate himna tur te leh Hindutva do let tura nasa
taka ke a pen theih nana MP nih duh a nih thu sawiin amah vote turin mipui a
sawm bawk a ni.
Rita Malsawmi hi
Pu LT Muana (L) leh Pi Vanlalruati, Kolasib Venglai te fanu, November ni 22,
1975-a Hortoki-a piang; Laipuitlang, Aizawl-ah a khawsa mek a ni a. Mipuiin
amah kan hriatna ber chu hla phuah leh zai lamah a ni. Zai lama Mizo ten kan
hriat hmain Kolkata-ah Koly Band-ah zaitu a ni. Mizo zinga modelling lama
sulsutu, Kolkata-a modelling hna thawk a, Modelling Agency te hial
partner-ship-a lo nei tawh a ni. Mizo zinga Five Star Hotel-a thawk hmasa pawl
a ni bawk. Mizoram a lo chhuah hnuah DDK-ah news correspondent hna a thawk thin
a. Film lam luhchilhin ZTS Audio & Visual Production-a producer a ni a,
intihsiaknaah pawh lawmman pakhat-na te lo dawng tawh a ni.
Social work lamah
Joshua Operation-ah President nilai niin, ZORO Gen. Hqrs.-a kum 10 chuang
Secretary nihna chelh tawh a ni.
Post a Comment