March 5, 2024 : Vawiin khan Indian Institute of Horticultural Research (IIHR), Hesaraghatta Lake Post, Bangalore chuan Dr Malsawmkimi, Senior Scientist and Head, KVK Khawzawl chu IIHR Technology te kuthnathawktute hnena hlan chhawn kawngah a thawh that avangin Award of Excellence for Promotion and Spread of ICAR- IIHR Technologies an pe a. Award hi IIHR, Bengaluru-ah Proj. Sanjay Kumar Singh, Deputy Director General (Horti Science), ICAR, New Delhi chuan a hlan a ni. IIHR hian vawiin vek khan Rabung khua Pu NB Sanga Chhangte hnenah ‘Best Farmer Award’ an pe bawk.
Dr. Malsawmkimi kaihhruaina hnuaiah KVK Khawzawl hian fur laia Tomato Mizoramin a chin ve theih loh chhan te an lo zirchiang tawh a. Dr. Malsawmkimi hian 2015 khan on farm trial-ah Introduction of Triple Resistance Variety Arka Rakshak chu hlawhtling takin Tuipui khua - Vanlalmuana huanah a lo en chhinpui tawh a, natna leh rannung laka thlai ven dan te a lo zirtir tawh bawk a ni. Kum 2018 khan Tualteah Arka Abhed leh Samrat te IIHR atang la chho lehin, thalai kuthnathawktute a kaihruai hmasaa, hei hian midangte pawh a tih hmuh chho zel a ni. KVK Khawzawl hian IIHR Variety Tomato bakah Dawnfawh Variety - Arka Shyam& Arka Muthu, Bean variety - Arka Anoop & Arka Suvidha leh Long bean Arka Mangala, Bawkbawn variety – Arka Harshita pawh hlawhtling takin kuthnathawktute lo/huanah a lo en chhin pui tawh bawk. Dr. Malsawmkimi hi Mizorama a thawktu lam zingah chuan IIHR award dawng hmasa ber a ni.
Pu NB Sanga Chhangte hian kum 2017 atang khan Tomato Arka Samrat ching tanin, KVK Scientist ten zirtirna an pe a. Rabung khuaah hian a ching hmasa ber a ni a, tunah hian Tomato ching hi Rabung khuaah hian in 40 vel an awm mek a ni. Pu NB Sanga hian kum 2023 khan Tomato atangin cheng nuai 8 a lei chhuak a, a hlawhtlinna kawngah hian sawrkar Department dang District Rural Development Office (DRDO) leh Horticulture Department te pawhin an ngaihsak hle a ni. Best Farmer Award hi Pu TC Lalliantluanga leh Pu Lalsangzuala, Tualte te chuan KVK Khawzawl kaltlangin IIHR atang hian an lo dawng tawh bawk a ni. ‘Best Farmer Award’ hi KVK Khawzawl in a dil sak a ni.
Post a Comment