Aizawl 07.03.2024 : Mizoram State Pollution Control Board sponsor a thirsakawra India ram fang chhuak tura kumin 2024 January ni 25 a Aizawl chhuahsan Lallawmzuala Varte (LZ VARTE) chuan State pasarih - Tripura, Meghalaya, Assam, Jharkhand, West Bengal, Odisha leh Chhattisgarh te tlawh tawhin, nimin (06.03.2024) khan Chhattisgarh state capital Raipur atangin Hyderabad, Telangana state a pan leh mek a ni.
LZ Varte hian nimin thleng khan ni 36 chhungin Km 3,691.62 a inkhalh tawh a, state a tlawh tawha khaw hrang hrangah Mizo awm ten an lo ngaihsakin an lo hlut thiam em em a, an lo mikhual thin a ni. Nikhatah km 110 bawr vel zel tlanin, state capital pakhat atanga state dang capital a tlan hun chhung chu ni 3 atanga ni 11 inkar a ni a. Kawng laklawha zan a riahna tur chu Mizoram Pollution Board-in state danga pollution board-te an lo biak lawk sak thin bakah mi thahnemngai tak tak ten an lo ngaihtuahsak thin a ni.
Lallawmzuala Varte (LZ Varte) hian Thlakhat chuang nitin deuh thaw a cycle-a a inkhalhnaah hian kawng lakah lo lawmtu a ngah hle a. Cycle-a lo zuite pawh an awm thin a. Pawl ho, amah lo lawmtute pawh an thahnem hle a, chung zingah chuan Ranchi Cyclotron-te, Vendanta facor-te, TATA Steel-te leh pollution kaihhnawih pawl hrang hrangte an ni. Hun a neih angin school thenkhat pawhin hun te an lo hmanpui a, University-ahte pawh sawm niin cycle-a India ram pum fan chhuah a tum chhan chungchangahte pawh inkawmnate an nei a. Ranchi, Jharkhand-ah cyclotron rally an lo neihpui tawh bakah a thlen chinah chuan Kalinga University, Chhattisgarh-ah rally pawh an lo neihpui nghe nghe a ni.
LZ Varte hian thirsakawra India a fan hi Mission Life (Lifestyle for Environment) hnuaiah niin, Mission Life hi boruak chhe zel humhim nana Prime Minister Narendra Modi’an kum 2021-a Glasgow International Climate Conference (COP-26)-a a thawh leh India chu khawvela hmahruaitu a nih mekna a ni a. LZ Varte hian Cycle-a India ram a fana a thu ken chu “Ride To Clean Air” niin, veivah nan cycle hman tam a tul thu a ni ber a. Hun an lo hmanpuina apiangah veivah nan cycle hman tam a pawimawhzia a tarlang thin. India ram state capital zawng zawngah a thlen hun hunah State Pollution Control Board-ten programme an lo hmanpui zel dawn a.
Km 16,000 chuang cycle-a a inkhalh thlen meuh chuan July thla tawp a lo ni tawh anga, India ram cycle-a fan chhuah tawh dawn bakah a cycle-a a inkhalh chhan, MISSION LIFE - Ride To Clean Air – chu India ram state zawng zawngah leh UT-ahte a hrilh darh hman beisei a ni.
Post a Comment