MLA IN PUC AH YUVA SAMVAD A HMANPUI
Aizawl 26.02.2024 (thawhtanni): South Tuipui bialtu MLA, Pu Jeje Lalpekhlua chuan Pachhunga University College-ah khuallian niin Yuva Samvad India @2047 programme a hmanpui.
He programme hi Ministry of Youth Affairs and Sports, Govt. of India in state tina National Service Scheme hnuaia unit hrang hrangte hmang tura a tih anga hman a ni a. Thalai ten ram leh hnam hmangaihna an neih thar theih nan leh zalenna hlut zia an hriatthiam thar theihna tura buatsaih a niin, India ram hmun hrang hrangah hman a ni.
He programme hi Dr K. Vanlaldinpuia, Programme Officer, NSS PUC Unit chuan a kaihruai a. Prof. Malsawmliana, General Secretary, Central YMA chuan resource person niin thu a sawi bawk.
He programme a khuallian Jeje-a chuan Mizoram in hma a sawn theih nan a sorkar hmalakna tur policy hrang hrangte tarlang in, hand holding policy chungchang leh zirlai te tana policy awm thei ang te a sawi a. Hnam dangte nena inkawm nel pawimawhna te, in zah tawn leh in hmangaih tawn pawimawhna tarlang in, Mizo nun ze mawite- tlawmngaihna te, huaisenna te, thawhrimna te leh aia upa te zah thiam pawimawhna leh chhawm nun zel pawimawh zia uar takin a sawi.
Resource person Prof. Malsawmliana chuan zirlai te fuihna thu sawiin, zirlaite chu theihtawp a ram leh hnam tana ke pen ve tur leh, lehkha an zirna kawngah ram leh hnam hmangaihna rilru pu chunga zirtur te, ram leh hnam thatna turah ngaihtuahna seng ve tur in a chah a. Tin, Mizo hnam hi kan changkan san thiang lo a, lehkha kan thiam san thiang lo bawk tiin a sawi.
Tin, NSS PUC Unit volunteer, Lalrinzuala leh Lalrempuii te hnen atangin "Yuva Samvad" tih leh "Goal of developed India" tih thupui hmangin thusawi ngaihthlak a ni bawk a ni.
Post a Comment