February 12, 2024 (Rauthla) : Vawiin khan Pu C. Rongura, Executive Member i/c LAD etc., LADC leh Lai Autonomous District Council-a MNF Legislature Party Deputy Leader Pu C. Rongura chuan a Office ah Lai Autonomous District Council-a MNF Legislature Party Leader Pu V. Zirsanga banna thehluh chungchangah Lawngtlaia thuthar thehdarhtute kawmin Pu V. Zirsanga banna chu MNF Legislature party chuan a pawm lo a ni, a ti.
LADC a MNF Legislature Party Deputy Leader Pu C. Rongura chuan, February 9, 2024 (Zirtawpni) khan MNF Legislature Party Leader Pu V. Zirsanga'n MNF Legislature party Leader atanga banna a thehlut tih a sawi a. Hemi chungchang ngaihtuah hian nimin khan Lai Autonomous District Council-a MNF Legislature Party leh MNF District Hqrs., Lawngtlaia Elected OB te nen an thutkhawm thu thuthar thehdarhtute chu a hrilh a. Pu C. Rongura chuan, he banna hi MNF Legislature party (LADC) chuan ngun takin kan ngaihtuah a, tun dinhmunah chuan Lai Autonomous District Council Constitution, Conduct of Business Rules 2010-in min hrilh angin, Legislature Party Leader a nihna a chelh theih lohna tur a awm loh avangin a banna chu hnawlsak a ni a, a nihna hi chelh chhunzawm zel rih se, tiin thutlukna kan siam ta a ni, a ti.
Kan tarlan thin tawh angin Lai Autonomous District Council-a Chief Executive Member Pu V. Zirsanga chu eiruk thubuai avangin Dr. HTC. Lalrinchhana, Special Judge (Prevention of Corruption Act) chuan thiamloh chantirin hremna a lo tichhuak tawh a. He thuah hian Pu V. Zirsanga chuan hremna thu an tihchhuahah lungawi lovin Court sang zawk, High Court ah zualko vin, High Court chuan Special Judge (Prevention of Corruption Act) in hremna a tihchhuah chu kalpui rih loh turin a ti a. January 31, 2024 khan High Court chuan Pu V. Zirsanga hi bail in chhuah a phalsak ta a ni.
MNF Legislature party hruaitute chuan kan ram leh hnam inrelbawlna dan kan neih Lai Autonomous District Council Constitution, Conduct of Business Rules 2010 dan tlawhchhanin tuna House Leader ni mek Pu V. Zirsanga chu a nihna la chelh chhunzawm zel turin an ngen a ni.
Lai Autonomous District Council CCB Rules 11 (2) in a tarlan dan member a nihna atanga ban theitu chu Chairman chauh a ni a. Hei pawh hi thla thum a ral hma loh chuan a taka hmalak ngawt chi a nih loh thu an sawi lang bawk a ni.
Post a Comment