February 10, 2024 (Rauthla) : Vawiin khan MZP General Headquarters, Emergency Meeting MZP Pisa Pui, Aizawl-ah neih a ni a, Rangvamual-a Govt. Nepali Primary School zirlaite sikul kawt tuala zirna an kalpui chungchanga an hmalak zel dan an rel.
Meeting-ah hian Govt. Nepali Primary School zirlaite class room indaih lohna avanga, hun rei tak sikul kawt tuala class an lak avang leh MZP Branch Rangvamual-in hun rei tak ata hma a lo lak tawhnain ngaihsak a hlawh tawk loh avangin, MZP General Headquarters, Aizawl chuan ni 7 February, 2024 (Nilaini) khan a hmunah a tlawh tih tarlan niin, Zirlaite ni sensa leh ruah sûr hnuaia class an kal chu pawi an tih thu an sawi bawk.
MZP hian 10 February, 2024 ral hma ngeia sawrkar thuneitu ten ruahmanna lailawk an siam lo a nih chuan MZP-in hma a lak tur thu a lo sawi tawh a. Meeting chuan, vawiin ni 10 February, 2024 (Inrinni) thlenga sawrkar hmalakna engmah hriat a nih loh avangin, karleh Thawhtanni (ni 12 February, 2024) hian Sikul hulhliap zar hnatlang a ko nghal a ni.
Govt. Nepali Primary School, Rangvamual-ah hian zirlai 127 (Nursery - 30, K.G - 22, Class I - 27, Class II - 19, Class III - 16, Class IV - 13) an awm mek a, Zirtirtu a nghet- pahnih, MR zirtirtu pakhat leh SEDP zirtirtu pakhat an nei mek a ni.
Post a Comment