February 20, 2024 : Lawngtlaia ‘Mizoram State Day 2024’ lawmna hun chu vawiin chawhma khan DC Conference Hall, Lawngtlaiah neih a ni a. Pi Margaret J Vanlalremmawii, SDO (S) chuan hun kaihruaiin, Pu Abraham Beirazi Khithie, Addl. DC chuan khuallian niin a ni.
Khuallian chuan chuan MNF leh Sawrkar laipui inremsiamna avanga Peace Accord siam a nih dan sawiin, State dinhmun luah tura Mizoram mipui tawrhna te, huaisenna leh inpeknate chuan thangtharte thinlungah ram leh hnam hmangaihna pian chhuah tir zel tura a duh thu a sawi a. Kum 20 chuang rahbehna hnuaia awm tawh kan nih avangin zalenna leh ralmuanna hlutzia hrechiangtu theuh kan ni, a ti a. Pu Abraham-a chuan ram thenawm a buaina avanga thlamuanna rawn zawng a kan State bel a raltlan rawn lutte tuamhlawm thei a kan awm hi a ropui a tih thu a sawi bawk a ni.
State dinhmun kan luah hnua Lawngtlai district pawhin hmasawnna hmel thar thahnem tak a hmuh thu khuallian chuan tarlangin, heng hmasawnna ruangamte hi tangkai tak a hmangtu ni turin leh hlawhtlin puitu nih tum theuh turin kalkhawmte a chah a. Mipui harsatna sutkian kawng a kaihruaitu leh hmasawnna kawng kawhhmuhtu nih tum tlat turin Lawngtlai district chhunga Sawrkar pisa a thawktute chu a fuih bawk a ni.
He huna thusawitu Pu H. Lalliantluanga, President, MUP chuan State ralmuang leh hmasawn ni chhunzawm zel tura mipui leh sawrkar a fawng chelhtute inkarah thawhhona leh tanrualna tha a awm a pawimawh thu a sawi a. Pu Hre Kung, MDC pawhin State dinhmun luah thei tur a ram tan a mi thahnemngaite inpekna hrereng chunga ram leh hnam hmangaih nachang hriat a pawimawh thu a sawi bawk a ni.
Lawngtlai District-a Mizoram State Day 2024 lawmna hunah hian Lawngtlai khawpui chhunga Sawrkar office hrang hranga hotute leh tlawmngai pawl hruaitute an tel a ni.
Post a Comment