February 22, 2024, Lawngtlai : Pu C. Lalrosanga, MP (Lok Sabha) chuan Lawngtlai leh Siaha inkalpawhna tura ‘Permanent Bridge over Tuipui Ferry’ sakna turin DPR ruahman a ni tawh tih sawiin, he lei hi metre 257.8 a sei leh metre 12.15 a zau tur a nih thu a sawi a. He hmalakna hi a hlawhtlin chuan Lawngtlai leh Siaha khawpui inkar kal hun chhung hi nasa tak a tih tlem a nih tur thu a sawi bawk.
He thu hi vawiina District Development Co-ordination and Monitoring Committee thutkhawmah Pu C. Lalrosanga, MP (Lok Sabha) chuan sawiin, hemi chungchang hi DISHA thutkhawm hmasaah an lo rel tawh thu a sawi bawk.
Pu C. Lalrosanga, MP (Lok Sabha) kaihhruai District Development Co-ordination and Monitoring Committee vawiina DC Conference Hall, Lawngtlaia thukhawmah hian kum 2023-24 chhung a Department 17 hnuai a Sawrkar laipui scheme kalpui dan thlirletna neih a ni a. MGNREGA hnuai a chhungkaw 37751 te hnen ah ni 81 inhlawhna siam a nih thu te, hna 2533 zawh fel tawh bak ah a dang 729 kalpui mek a nih tih tarlan a ni a. PWD hnuai a Pradhan Mantri Gram Sadak Yojana kaltlang a hna hlawm 20 kalpui zingah 13 chu zawh fel tawh niin hna 7 thawh mek a nih thu tarlan a ni.
Kawlphetha avanga Lawngtlai district-in harsatna an neih thin dan leh heng harstana sutkian nana P&E department hnuai a 25 MVA, 132/33kV Sub-Station sak hna te, lo, huan, ram a kawlphetha pawh luhna tura a hranpa a 11kV feeder siam a nih thu leh Power Sector Development Program hnuai ah kawlphetha hrui pui hman lai a tha zawk a thlakna tur dilna thehluh tawh a nih thu tarlan a ni bawk. Lawngtlai district khaw hrang hranga in 24082 chu Jal Jeevan Mission kaltlangin tui thianghlim her haw theih a thlunzawm an nih tawh thu sawi niin ODF+ dinhmun luah thei turin khaw hrang hrang ah hmalakna chak tak a kalpui mek a nih thu tarlan a ni.
Post a Comment