February 29, 2024 (Rauthla) : Lai Autonomous District Council-a Chief Executive Member Pu V. Zirsanga chuan tunlai hian MNF party MDC thenkhat ten CEM atangin bang turin an nawr a tih a sawi a, LADC sorkar tluang taka a kal theih dawn chuan a dinhmun kiansan a, ban a hreh lo tih a sawi bawk.
CEM Pu V. Zirsanga chuan vawiin khan a office chamber-ah Lawngtlaia thuthar thehdarhtute kawmin, CEM chuan February 9, 2024 ah khan MNF Legislature Party Leader a nihna chu Deputy Leader hnenah a submit tih sawiin, February 11, 2024 khan MNF Legislature Party thukhawm chuan a banna hi an pawmsak ta lo tih a sawi a. A banna an pawmsak tak lohah chuan office pawh la kal a, la luah a nih thu a sawi. Hetiang a nih hnua MNF party MDC thenkhat ten CEM bang tura an nawr a, Legislature Party Leader a nihna pawh pawm lo ang a, thil an han ti leh hi chu hriatthiam harsa a tih thu a sawi a. MNF Legislature Party in leader a nihna a bansan chu pawmsak sela chuan CEM nihna chu automatically-a a bansan mai tur thu a sawi bawk.
Pu V. Zirsanga chuan 'MNF MDC thenkhatte hian State sorkar lai ZPM a zuan lawr hi an duh a ni lova, an lehkha ziak anga keimah ngawr ngawra avanga hetianga an kal a nih chuan tlawmngai takin lo let leh sela, kei chu ka bang thei reng a ni' a ti a. 'MNF MDC te hi lo let vek sela, anmahni nen leader dang thlang ila. LADC ah hian MNF Legislature Party, MNF party sorkarna hi tluang taka a kalpui leh hi tha ka ti a, chutiang chutiang tur chuan ka ngen bawk a ni. State sorkar lai ZPM a zuan lawr duhna rilru an neih lova, keimah avanga hetiang an an awm a nih chuan Legislature Party leader ka nihna hi ka bansan thei a, engmah nihna nei lovin ka awm hreh lova, sorkar sorkar thar MNF Legislature Party thar lo piang tura hi ka theihtawpa tanpui ka inhuam a ni' a ti.
CEM chuan 'kan thiante MNF MDC thenkhat chhuak ten keima Leadership duh lo hrim hrim a an chhuaka hi pawi ka ti a, MNF Legislature Party in Executive sorkar siam leh tura an lo kir leh hi ka beisei tlat a, chutiang turin ka sawm a, lungrual takin ngun takin lo inngaihtuah sela, ka leadership na hnuaiah ni lovin leader an thlanna hnuaiah LADC ah hian MNF Executive Committee hi din leh ila tih hi ka duhthusam a ni a, chu kawng a hlawhtlin theihna tur chuan kei hian engkim ka kalsan huam a, ka member pui zahawm tak tak te hi ka sawm a ni, a ti bawk.
Pu V. Zirsanga chuan 'Legislature Party tih leh Executive Committee tih chungchang hi sawi fiah ka duh. Inthlannaah party in election kan contest theuh a, chuta kan party atanga MDC/MLA kan thlantlinte hian Legislature Party an din a, chu Legislature Party an dinah chuan member chu MLA kan tihte, MDC kan tihte hi an ni a, tichuan chungho chuan Leader an thlang a, chu leader chu sorkar formation-ah Chief Minister tur tihna a ni. Council-ah erawh chuan Chief Executive Member ni tur a ni. Tichuan, MNF Legislature Party leader nihna ka bansan hi min pawmsak sela chuan CEM a hi automatically-in ka bang mai tur a ni. MNF Legislature Party chuan sorkar kan siam takah chuan Executive Committee kan form a, CEM in a kaihruai a, Executive Committee-ah chuan MNF Legislature Party MDC kan tih ho hi member an ni vek lo, office holder ho kha Executive Committee member tia Committee-ah pawh kan kal dan a ni. Chuvang chuan helaiah hian Leader nihna chauh a bang a lawm, CEM nihna a bang hleinem an ti hi chu Legislature pian dan leh Executive Committee pian dan a hi kan hrechiang lo ni deuhin a lang' a ti bawk.
Post a Comment