February 28, 2024 (Rauthla) : Sports & Youth Services Minister Pu Lalnghinglova Hmar chuan Lawngtlai Vengpui YLA Field siam hna chu thawh zawh a la ni lo tih sawiin, hnathawh zawh hun tura ruahman chu kumin July 11 a ni tih a sawi.
Vawiin Mizoram Assembly session-ah Lawngtlai West bialtu MLA Pu C. Ngunlianchunga zawhna chhangin, Sports Minister Pu Lalnghinglova Hmar chuan Lawngtlai Vengpui YLA Field chu hun tiam chhungin thawh zawh hman ngei tum a nih thu a sawi a. A siam hna buaipuitu contractor chu MS Decor India, GS Road Guwahati an ni tih sawiin, an ni hi Sports & Youth Services hnuaiah hna thahnem tak an thawk tih a sawi bawk.
Pu Lalnghinglova Hmar chuan Lawngtlai Vengpui YLA Field siamna atan hian work order amount chu cheng nuai 914.77 a nih thu sawiin, hnathawh nan cheng nuai 871.73 pek a ni tawh tih a sawi a. 'Hnathawh hi Mizoram State Sports Council Engineer ten an endik thin a, Mizoram State Sports Council in Mizoram puma sports infrastructure te a enkawl avangin Lawngtlai Vengpui YLA Field pawh hi Mizoram State Sports Council Engineer ten an awmchilh thei lova, a remchan dan angin an tlawh thin a, hnathawh tha tawk lote a awm a nih pawhin siam that tir leh vat thin a ni' a ti.
Zawhna neitu Pu C. Ngunlianchunga chuan Lawngtlai Vengpui YLA Field chu a tlawh thin thu leh hnathawh a chhiat thu a sawi a. Pavillion pathum phei chu ruah sur se player ho awm nan pawh a tlak lova, tuiin a theh vek dawn a ni, a ti a. Bathroom leh Changing room te pawh a tha lo hle a ni tih a ni a. Mizoram State Monitoring Committee in he project hi en ve se a duh thu a sawi bawk.
MNF sorkar laia July 12, 2023 a Lawngtlai Vengpui YLA Field hawn a nih khan Technical Report-a a landanin Lawngtlai Vengpui YLA Field siam nan hian PMJVK Scheme 2020-2021 atangin cheng nuai 1005.34 dawn a ni a. Central share hi 90% cheng nuai 904.81 niin, state share hi 10% cheng nuai 100.53 a ni.
Post a Comment