Aizawl 24.02.2024 (Inrinni) : Mizoram hmun hrang hranga a thlawna sem tur damdawia chiah thosilen, Long Lasting Insecticidal Nets chu vawiin khan Health Minister Pi Lalrinpuii chuan Aizawl atangin a vailiam.
LLIN thosilen hi Malaria laka invenna tur atana Global Fund sum hmanga Sorkar laipui hnuai National Vector Borne Diseases Control Programme kaltlanga hmuh niin, Mizoram tan thosilen nuai 4, 14,197 pek a ni a, kumin March leh April thla hian Mizorama District 9-a Malaria hluarna khua ah te sem zawh hman tura hmalak a ni.
Health Minister Pi Lalrinpuii chuan, natna chi hrang hrang tireh a umbo tura mithiamten ruahmanna an siam a hlawhtlin ngei theih nan inrelbawlna chhawng hrang hranga thawktute’n a nih dan tur ang taka kalpui a, tih tak zetna nen an thawh a pawimawh a ti a, state dang mipui nen khaikhin in Mizorama chengte chu mi tlem te kan nih avangin tih tak takna nen chuan hmasawn a harsa lo tih rilru pu chunga inthlahdah loa thawk turin kalkhawmte a chah a ni.
Health department tarldan dain, tun dinhmunah Mizoram chu mi 1000 zel atanga Malaria vei hmuhchhuah zat tam lamah India state zinga Malaria tamna ber a ni mek a, nikum chhung khan thisen test nuai 3, sing 3, sang 4,100 atangin Malaria vei hmuhchhuah mi 17,988 an awm a, nunna chan mi 13 an awm bawk a ni.
LLIN-TIH TUR leh TIH LOH tur te:
1) In leh ramriahna ah LLIN hnuaiah ngei zantin mut tur.
2) Thosilen hi hman hmain darkar 24 dahchhuah hmasak tur.
3) Thosilen hi mar taka zarin, awngphah hnuaiah bilhluh thlap tur a ni.
4) LLIN hi tuilum, sahbawn leh surf te nen sukloh tur, tui hlang in zawite a nuai a suk tur a ni.
5) Suk zawhah nisa ah nilo in, daihlim hnuaiah zar thin tur a ni.
6) LLIN hi suk lai in nuai leh sawp vak vak te tih loh tur.
7) Sangha leh lui lam sa reng reng man nan hmanloh tur a ni.
8) LLIN hi hralh chhawn emaw pawhpen phal a ni lo.
9) LLIN hian kum 3 leh vawi 20 suk daih tura duan a ni.
10) LLIN hi lei leh hralh khap tlat a ni. Kum 3 chhungin engtik hunah pawh endik theih turin kawl that tur a ni.
Post a Comment