CHAPCHAR KUT Vs HLUKHLA
- Mafaki Hnialum
Chapcharkut hi chu sawi ngailoin kan hre theuh turah ngai i la, Hlukhla erawh hi chu kan tharthawh lehna a la reiloh deuh avangin hrelo pawh kan la awm maithei a, Mizo kut ropui ber Chapcharkut ang tho a Lai hnam kut ropui ber ti ve tawp mai ang. Heng kut pahnih te chanchin ngawr ngawr hi chu ka sawi tum dan pawh a ni chiah chuang lo a, a chhehvel zawk hi kan thlir mai mai dawn a ni.
Hlukhla hi kan Lai khawpui Lawngtlaiah chuan vawi 4/5 vel kan hmang ve tawha, a vawikhatna hi chu Chapchar kut nen kan hmang kawpa, a bak vawi hnih erawh chu a hlangin kan hmang ve tawh thung. Chapcharkut hi kan lo hman hmasak zawk a nih avangin a vawikhatnaa about-turn thut kha chu kan lo harsat ve deuhte pawh a ni mahna. Hlukhla kan hman hma hian Chapcharkut hi State Official day a nih ang leh, sorkar department thenkhatte chu hmang tura beisei kan nih angin kan lo hmang thin a. A hlanga Hlukhla kan hman hnu pawh hian hman a la ni ve tho a, State Official day a nih avang hian kan la hman ve zel pawh a rinawm bawk. Chutih rualin heng kut pahnihte hi hmanna lam zawk nei erawh kan awm ngei a rinawm. Mizo leh Lai hi hnam unau kan nih angin kan kutte pawh hi kan inchhim tawna kan inhlutsak erawh thil tha tak a ni. Amaherawhchu, Lai nu MHIP member, a hnam kut Hlukhla hmang duh si lo a Chapcharkut zawk hmang ta tlatte hi kan lo awm palh thei a, kan lo awm tak takte a nih phei chuan ngaiteh; chutiang nu chuan thuhril theihna te neiin tuifinriat kang chah rawt theihna khawp thu pawh pe thei mahse, ka ngaihsan zawng erawh a ni hauh lo ang. Chutiangin NGO dang members te pawh. LWA ho hi chu Hlukhla lamah zawk an kal han ring deuh rawk i la. An ni pawh hi Hlukhla hmang duh si o a Chapchar kut zawk an lo hmang ve te a nih chuan LIKBK nu-in an kohhran nu pawl khawmpui chhim duh si lo a LAD (UPC hmeichhe pawl) inkhawmpui va chhim ta daih ang vel an ni ang. Hnam thilhah hi chuan a kohhran ang zawng emaw, a NGO leh thidang ang zawng pawhin lo inthliar kikawi ve lo mai i la, kawi kawm thin ang thapa tanrual hi kan hnam damna tur a ni. Lai hnam kut ropui Hlukhla hi LADC staff te emaw, LWA ho leh LIKBK ho hman tur biakah te kan lo ngai palh hlauh a nge.
Mizo te hi lehkha thiam hmasa deuh zawk tih takah Lai ho ai chuan hmasawnna kawng engkimah an lo advance deuh zawk a. An tihang Keini'n a nachang kan hriat ve hi chu tlai khaw hnu zelah a ni. Chutiang chuan Young Lushai Association lo ni hmasa kha Young Lai Association neih nachang kan han hriat ve takah chuan kan YLA ta dial a. NGO dangte pawh kan hnam pualin kan neih belh ve zel a, LUP erawh a dinna a la rei loh deuh avangin veng/khaw thenkhatah chuan MUP Branch te pawh a la awm a, an ni pawh hian LUP ni tawh turin an khel an let mek a ni. LWA erawh thangkhatlian zet kan lo nei ve tawh nangin YLA angin kan la LWA zo ve thei tlat lo mai a, eng kan ti bik nge ni kei ni nu ho hi, MHIP branch tharte pawh a la ding ta deuh deuh a ni awm e. Chutiang zelin tun hnaivaiah kan hnam pual liau liaua kut kan han hmang thei lehzel te hi a va lawmawm em!
Mahni hnam puala kut neih leh hman hi a hlu em reng bawk a, kan hnam zia leh nihna hrang hrangte zalen leh hlimawm taka a pui a nawia kan pholanna ni leh, kan thar thawh lehna hun a ni a. Chulam thil kan inzirtirna leh kan humhalhna hun tha tak a ni bawk. Mahni ram leh hnam ngainatna leh hmangaihna thinlungte pawh min neih thar tir sawng sawng thei a ni. Hetianga kan tu leh fa ten kan hnam zia leh hmelhmang an hmuh theihna hun tha tak kan lo nei ve ta reng mai hi a va hlu em! Hlukhla kan han hmang meuh chu kan hnam tawngin kan tawng a, kan hnam thuamin kan inthuam a, kan hnam zaiin kan zai a, kan hnam lamin kan lam bawk a. Eng hnam nge kan nih tih pawh hriat theih mang loh a kumpui linglet lo awm tawhte pawh hemi ni zet hi chuan hai rual kan ni lo. Kan ram hruaitute leh NGO hruaitu thenkhat kumtluana Lai tawnga tawng hman mang o te leh thiam ve ngawr ngawr te pawhin kan hnam tawng ngeia thu sawi vek kan tumna ni a han nite pawh hi ropui tak a ni. Heng zawng zawng hlutna belhchhahtu chu zalen taka tu mitmei mah ven ngai lo leh pawl bik awm lo a kan hnam kut ngei kan han hmang thei hi a ni. Lai tawng hre lo tih vel pawh venthawn an ngai ve tawh lo tihna a nih chu.
Chapcharkut zawk kha chu lo hmang ta reng ni i la, heng hlawkna kan hmuh tur zozai te hi kan chan then nasa dawn si a. A chhanchu, Lai then tih loh Lai taka chapcharkut hman kha a rem ve tlat lo a ni, venthawn tur a awm tlat thin. Kan hnam kutah erawh engmah venthawn tur a awm ve tawh loh avangin rilru zalen leh thlamuang takin kan hmanga, Chapcharkut kan hman lai ai ngawt kha chuan kan hlimin kan hlawhtling tih pawh hai rual a ni lo.
Hetianga kan hnam kut ngei kan tharthawh leh theihna tura hma lo latute hi mimal sorkar leh pawl ang pawhin zah leh chawimawi in phu a, in thil tha tih hian kan ram leh hnam tan rah duhawm tak a chhuah ngei ang. A tawp ber atan leh heng kan thil sawi zawng zawngte khaikhawmna atan chuan, "Kan hnam leh kan hnam thil ngaihsan leh ngaihhlut kawngah tran i la ang u" tih hi a ni.
Post a Comment