January 31, 2024 (Rauthla) : School Education Minister Dr. Vanlalthlana chuan SEDP a lo tawp tak avangin heng SEDP hnuaia teaching leh non-teaching staff te hi rawih an nih hun chhung bak chu pawh seisak an rem dawn lo, a ti.

Vawiinaa pisa a thuthar thehdarhtute a kawmnaah School Education Minister chuan SEDP hnuaia zirtirtu leh non teaching staff mi 1000 chuang rawih mekte chu March ni 31, 2024 thlenga thawk tura lak an ni tih leh SEDP alo tawp tak avangin heng teaching leh non teaching staff-te hi rawih an nih hun chhung bak chu pawh seisak a rem dawn lo tih Dr. Vanlalthlana chuan a sawi bawk a, post awl erawh hnawh khah vat a ngaih dawn avangin The Mizoram Direct Recruitment (Conduct of examination) guidelines, 2018 hmangin post hnawh khah tul angte hnawh khah a nih tur thu a sawi bawk.

School Education Minister chuan SEDP hnuaia teaching leh non-teaching staff atana lak tam takte chuan ai kal an la tih hriat a ni a. Heng mite hi an hnathawhna tur hmuna an awm ṭhat loh avangin anmahni bank account-ah ni lovin, ai kala an chhawr, hna thawk tak tak zawkte bank account-ah an kut hah man (honorarium) hi thunsak tum a ni, a ti a. School Education Department hnuaia teaching leh non-teaching staff ai kal late list chu DP&AR (ARW) hnenah theh luh a ni tawh a. An dinhmun tur chu DP&AR thu ngaihchan a ni, a ti bawk.

Minister chuan zirtirtu hna lakah minister emaw ZPM party-in emaw list ang nei dawn loa, fair takin a thiam thiam lak an ni dawn tih a sawi bawk a, zirna siamthat zelna turin Mizoram Education Reforms Committee kalphung siam tha turin high level committee din a ni dawn tih sawiin, zirna kawng hrang hranga thurawn lakna tur leh zirna kalphung zir bingna leh ruahmanna buaipui tur Education Consultant ruat a nih dawn thu a sawi bawk.

School Education Minister chuan Samagra Shiksha Abiyan hnuaiah zirtirtu 161 lak a ni dawn a, he hna lak turah hian Interview bakah exam a awm dawn tih sawiin, hna dil tute chu an teaching quality topic thlan chhuah 10 atangin endik vek anni dawn a sawi bawk. Tun hnaia sorkar sikul thawmthat leh sakthat hna pek chungchang thuthar lakhawntute zawhna chhangin Education Minister chuan hna pek chhuahah cheng nuai 30 hnuailam chu tender loa pek theih a nih thu a sawi a ni.

Post a Comment

Powered by Blogger.