January 31, 2024 (Rauthla) : Dr. Lorrain Lalpekliana Chinzah, Lawngtlai East Bialtu MLA leh Adviser to Chief Minister (Health & Family Welfare Dept. & Agriculture Dept.) chuan vawiin khan Social Welfare Department hnuaia sawrkar hmasa hmalakna a sak Observation Home, Lawngtlai Council Veng a mi chu a hmun ah a tlawh.
Lawngtlai East bialtu MLA hi District Child Protection Unit a thawktute’n lo dawngsawngin, thawktute chuan tun dinhmunah hian a building chu luah theih angin lang mahse, a hungna (fencing) engmah a la awmloh avangin luah ngam a nih loh thute, a panna kawng pawh duhthu a sam loh thute leh, a building sak dan leh estimate inmil tawklo awm lai te chu MLA hnenah hian an lo thlen a ni.
Dr. Lorrain Lalpekliana Chinzah chuan District Child Protection Unit lama thawktute’n a hnena thu an thlen chu a tul anga hmalak pui a duh thu a sawi a. Observation Home Building hawn mai theih tur a fencing awm loh avang leh, harsatna dang avanga hawn theih a la ni rih lo chu thuneitute hnenah theihtawp chhuah a hmalak pui a tum thu a hrilh a ni.
Dr. Lorrain Lalpekliana Chinzah hi ZPM Lai District Headquarters Lawngtlai aiawhin Adviser Pu K. Hrekung MDC, Pu Ricky H. Lungrualkima Secretary leh Samuel Laldawngliana Secretary te'n an tawiawm a. Pu Elvis Lalthangzuala, President Lawngtlai District Village Council Association pawhin a tawiawm bawk a ni.
Post a Comment