January 31, 2024 (Rauthla) : Lawngtlai District Students' Association (LDSA) hruaitute chuan nimin khan Raj Bhavan Aizawlah Mizoram Governor Pu Hari Babu Kambhampati hmuin, Lawngtlai District chhunga Autonomous District Council pahnih LADC leh CADC ah te The Right of Children to Free and Compulsory Education (RTE) Act, 2009, hman a nih thuai theih nana hma la turin an ngen.
LDSA chuan RTE Act, 2009 chu Mizorama ADC pathum zingah Mara Autonomous District Council chauhin an hman thu Governor hi hrilhin, Lawngtlai District chhunga zirna quality a lo that theih nan leh zirnain hma a sawn a, zirtirtu quality zawk an awm theih nan RTE Act chu hman ngei a tul thu an sawi.
LDSA chuan Sixth Schedule of the Indian Constitution-a a in ziak angin, Parliament Act reng reng chu President of India in ziaka Mizoram chhunga Autonomous District Council ah te exception emaw modification a siam a nih loh chuan a nihna anga hman tur a ni tih a inziak tih sawiin, Governor hi state constitutional head a nih anga Mizoram chhunga District Council pahnih CADC leh LADC a RTE Act, 2009 implement a nih theih nana hma la turin an ngen a. Tin, LADC leh CADC ah NCTE norms mila Elementary Teacher recruitment rules te pawh siam anih theih nana hma la tur leh, a bik takin Elementary section zirtirtu atan a hniam berah Senior Secondary pass leh trained teacher bakah Teacher Eligibility Test paltlang ngei lak an nih theih nana hma lak sak turin an ngen bawk.
Governor hian LDSA hruaitute thusawi hi ngun taka lo ngaihthlak sakin, LADC leh CADC chu lehkha a pek tur thu leh a tul anga hma a lo lak sak tur thu a lo hrilh a ni.
Post a Comment