January 30, 2024 (Rauthla) : Vawiin khan Dr. Kenneth Chawngliana, Vice Chairman, Mizoram State Planning Board chu Blessino Nursing School ah Chief Guest niin, lukhum khumtirna leh khawnvar chhi-a thu tiam lakna hun 5th Capping, Lamp Lighting & 2ndGraduation Ceremony a hmanpui.
Dr. Kenneth-a chuan zirlai kal khawm te fuihna thu sawiin, “He institution atang hian mi tam tak zir chhuakin, in zir chhuah hnuah Mizoram tan, India ram tan leh mihring puite tan rawngbawl theihna tura zir chhuak tur te in ni a chuvangin hlawhtling taka zir chhuak turin duhsakna sang ber ka hlan che u a. Nangmahni tan mai ni lo in chhungkaw tan leh ram tan rawngbawlna pawimawh tak nei thei tur in ni tih hre rengin taima tak leh hlawhtling taka zir chhuak turin duhsakna ka hlan che u,” a ti.
Nurse hna hi hna zahawm a nih thu sawiin, Dr Kenneth-a chuan, “Keini Mizo Christiante phei chu Isua hnungzuitute kan nih avangin Isua Krista pawhin he leia a awm laia a hnathawh zinga langsar ber tihdamna hmanga Pathian ram chanchin tha hril a ni a. Mizo te hi Kristianna in kan nun chhung ril thleng pawh a min kaihruiana hi a lang chiang em em a. Mizo nurse India ram leh ramdanga thawk te pawh hi mi khawngaih thei tak leh damlo te ngainat hlawh em em an ni vek zel a,” a ti.
Vice Chairman chuan Blessino dintu leh neitu Dr C Vanneihthanga te nupa chu an thahnemngaihna leh mipui tana rawng an bawlna ah an fakawm hle ani tih sawiin, “Healthcare lamah an nupa hian an tui em em a. Tunah hian a neitupa ber Dr. C Vanneihthanga, Managing Director, phei hi chu sorkar lama a hna thawh pawh bansan hial khawpa nursing lam tui mi a ni a. A nupui Pi Lalengzami pawh hi hetiang lama tui mi tak bawk niin tunah pawh Champhai khawpuia government nursing school a hotunu ber ani nghe nghe a ni,” a ti bawk.
He hunah hian Joint Director Nursing (Rtd) Pi Lalbiaksangi chuan 2nd batch zirlai tharte chu lukhum khumtirin, khawnvar a chhittir a, Felicitation of graduates hi Pi Lalduhsaki, Assistant Professor, Mizoram College of Nursing in a huaihawt bawk a ni. Tun ṭumah hian Blessino Nursing School 2nd batch aṭangin zir chhuak (graduate) mi 31 an awm a ni.
Post a Comment