December 11, 2023 (Rauthla) : Pu Lalduhoma, Chief Minister chuan “Kan hnathawh atangin mipuiin min endik se, sawrkar leh tlaka min ngaih theih nan tlak huamin hna kan thawk dawn a. Ni 100 chhunga kan tih tur kan puante khawng takin kan kalpui dawn a ni,”a ti.
Vawiin khan ZPM chuan an Party Office-ah chhung inkhawm hun an nei a, he hun hi Pu Lalduhoma, Chief Minister chuan hmanpuiin, Pu Lalduhoma chuan, “Inthlan zawh takah khan ka beisei aia tlem kan tling a, kan tlin lohna tam tak chu sum leh pai vang a ni. Sawrkar siamtu ni mah ila sum leh pai hmangin vote kan zawng ve dawn lo. A bikin minority area lamah kan tling mumal lova, ram puma rual taka mipui kan kal tlan theih nan thianghlim takin hma kan la ang. Chief Minister-in works department a chang lo ang kan ti a, works department ka chang lova, bial tin ka enkawlpui vek zawk dawn a ni. Mipui, neutral-te avangin hnehna kan chang a. Neutral an tam poh leh ram a kal tha dawn a, party ruihchilhna hi kan kalsan tial tial a ngai” a ti.
Chief Minister chuan, “Bial tinin Minister kan duh vek a, mahse Minister bial nih chak hi thil awmdan an hriat tawk loh vang a ni. Mipui sawrkarah chuan Minister leh MLA an inthlau vak dawn lova. MLA-ten Department an enkawl dawn loh avangin bial tan leh ram mipui tan theihtawpin an thawk thei zawk dawn a ni” a ti bawk.
Post a Comment