Press Club ah Minister

    Vawiin Dec. 8, 2023 khan Minister atana lakluh thar Pu K. Sapdanga, Pu Lalnghinglova Hmar leh Dr. Vanlalthlana te chu Aizawl Press Club ah an rawn leng lut a, MJA member te nen thingpui in hovin inkawm na hun ṭha tak an hmang.

MJA Gen. Hqrs. President Pu C. Lalrambuatsaiha chuan he hun hi kaihhruaiin MJA president lo ni tawh, tun sorkar a Home Minister ni bawk Pu K. Sapdanga chuan thusawiin Media chu minister a nihna kawng sialtu leh hlangkaitu a ni tiin, he mawhphurhna a namluttu Media a nih angin MJA member te chu amah ṭawiawm a thlawp tur leh finchhuah turin a sawm a. Pu Sapa chuan kan ramri  a sumdawng driver te lak a  receipt awm lo tur chhiah kan lak vak vak hi ram hmel ti bal tu ni a a hriat thu leh, tih tawp ṭul a tih thu a sawi.

   Sports Youth Service Minister Pu Lalnghinglova Hmar pawhin MJA te chu a tih dik lo hrilh hreh lova a ṭul ang thurawn pe tur leh finchhuah turin a sawm bawk.

   DIPR Minister Dr. Vanlalthlana pawhin chanchinbu khawvelah a mikhual loh thu leh a theih leh phak ang tawka media lama a lo inhman ve tawh ṭhin thu sawiin MJA member te nen ṭha taka an thawhho a beisei thu a sawi.

   Minister tharten lakluh an nih hnu an chenna pan hmaa Aizawl Press Club an rawn tlawh hmasa ber chu MJA chuan lawmawm a ti hle a. Minister te hi an nupui ṭheuh ten ṭawiawmin, DIPR director Pu C. Lalnunkima leh Dy. Director Pi Mina Zoliani bakah Serchhip leh Champhai MJA member te an tel bawk a. Minister Pu Sapa'n KFC leh thingpui tui tak a buatsaih chu an eiho a ni.

Post a Comment

Powered by Blogger.