LDFA Age Group Tournament 2023 (Under-10 & Under-12) final khelh a ni

December 20, 2023 (Rauthla) : Vawiin khan Lawngtlai District Football Association (LDFA) buatsaih LDFA Age Group Tournament 2023 (Under-10 & Under-12) final chu CYLA Playground, Lawngtlaiah khelh a ni a, Under-10 ah Chandmary (A) chuan 4-0 a Lawngtlai Vengpui hnehin an champion a, Under-12 ah Council Veng (B) chuan Chawnhu 2-0 hnehin an champion bawk.

Final match khelh hmain Closing programme hman a ni a, he hun hi Pu T. Rohlupuia, Central YLA Fin. Secretary chuan khuallian niin a hmanpui a, khuallian hi Pu Eden Lalrammawia Chinzah, CEC, CYLA chuan a tawiawm bawk a ni.

Khuallian Pu T. Rohlupuia chuan infiammi ni tur chuan zuk leh hmuam leh ruihhlo laka fihlim a tul thu sawiin, naupangte chu zuk leh hmuam leh ruihhlo laka fihlim turin a chah a. Sport-a hlawhtling tur chuan tih takzet a ngaih thu leh taima taka thawh a ngaih thu te a sawi bawk.

MIMAL LAWMMAN

Top Scorer (U-10) : Lalmalsawmhlua, Lawngtlai Vengpui (2 goals)
Top Scorer (U-12) : Lalhmingmuanpuia, Council Veng B (3 goals)
Best Player (U-10) : Moris Rohluzuala, Chandmary A
Best Player (U-12) : Rodingngheta, Council Veng B
Best Goalkeeper (U-10) : Andrew Rosangzuala, Chandmary A
Best Goalkeeper (U-12) : Lalrintluanga, Council Veng B