Laldingliana'n WBC Asia super bantamweight title a hnaih hle a, inrinni chawhnuah unanimous decision-in round 10 an inhnek chhunga talbuai nasa zawk Thattana Luangphon a chak.
Suamlum Night Bazaar, Bangkok-ah kum 24 mi Dinga'n boxing a khelh chhunga inhnek lian leh pawimawh berah hnehna ropui a sual chhuak teuh viau a, champion lai leh khawtual mi Chainoi Worawut tia hriat tel Thattana chuan round riatnaah knockout a pumpelh hram.
Thai number one hi judge pathumin 96-94, 96-94, 96-94-in round ruk an chaktir vek a, WBC Asia super bantamweight title a humhim.
WBC India bantamweight champion Dinga'n a tir atangin inringtawk takin a hmachhawn a, round riatnaah a ding lamin chiang takin a hmaiah a hnek. Thai boxer talbuaiin Tuipui tlangvalin a um zui a, hual chepin a ding leh veiin a hnek zawn a, tute mahin an la hneh ngai loh Thattana tlu teuh hle mah se a tal chhuak hram.
Round hnuhnung pahnihah 2019 LPS Pro Fight bantamweight champion Dinga'n panin hnek tluk tumin a bei zui na a, Thattana chuan a ke chheh a siam thar leh a, vawi 25 a inhnekna niin a tum 24 nan chakin vawi khat a inhnehtawk tawh a ni.
Round 10 an inhnek chhungin derthawng lovin Dinga a ding nghet a, khawmualpui title a chuh hmasak berah huaisen leh beiseiawm takin inlan mah se uiawm takin a chak zo lo a, professional boxing a khelh tum rukna niin a vawi khat nan a tlawm.
A hmain Thai khawpuiah hian Vanlalawmpuia leh F Zoramchhana'n WBA Asia title chuh tawhin an hlawhtling lo a, Dubai-ah NT Lalbiakkima'n WBC Asia title chuh tawh bawkin ani pawh a chak zo bik lo.
Tawn hriat nei tha, kum 26 mi Thattana chuan a tir atanga round sarihna thlengin mar tha takin a khel a. A kutchhuak a hlawm thain a rang a, lehlam invenna karah hnek tlangin a hnuai leh chunga a hnek thin bakah chiang taka fuh a nei fo.
Dinga vei vai a tangkai a, a ding lam leh thui taka a hnek chhuah thin chhawr telin round hnihnaah a nawr hneh. Mahse, Thattana chuan tamhmun siam remin awmze neia a vai bakah dik leh rang taka a hnek chhuak zauh zauhin lehlam chet a tiharsa.
Mizo boxer-in eng emaw chen remchang a nghah hnuah round riatnaah chiang takin a hnek a, a buzawlah Thai chiaia a inven laiin chho zawngin a dawm lo va, nasa takin vai tawn mah se Thattana knockout hmasa ber a nih theihna hun tha a liam zui ta a ni.
Post a Comment