Nov. 28, 2023, Lawngtlai : Pu Hmingthanzuala, DIPRO chuan vawiin khan a pisaah MJA, Lawngtlai District member-te kawmin Vote chhiar huna result puanzarna kawngah felfai tak leh awmze nei tak a media centre hman tangkai dan tur a sawi pui.
Thutkhawmnaah hian Election Commission of India-in Counting Hall-a Media person-te tan a inkaihhruaina a tihchhuahte leh Chief Election Officer, Mizoramin November ni 24, 2023-a Press Note a tihchhuahte en ho niin Result puanzar kawngah Media Center kaltlanga Electronic Media hman tangkai dan tur sawi ho a ni a. ECI-in Counting Hall luh phalna Authority Letter-a pekte chu thuneitute enpuina hnuaiah Counting Hall an luh theih tur thu leh Mobile phone ken luh phal a nih loh thu sawi a ni.
Vote chhiar a nih hunah result chu Encore Portal-ah dah nghal zel a nih tur thu leh Internet hmangin results.eci.gov.in website-ah en theih a nih tur thu Pu Hmingthanzuala chuan tarlangin, a remchan danin Media centre-a result puanna chu live telecast tum a nih thu a sawi bawk a ni.
Lawngtlai district chhunga Vote tla chhiarna tur hian Govt. Lawngtlai College-ah Counting Centre pathum ruahman a ni a. Vote chhiarna dawhkan hi a vaiin 39 ruahman niin Counting Supervisor, Counting Micro Observer leh Counting Assistant atan mi 187 ruat an ni. Counting Official-te thutna tur tihchianna, 2nd Randomization chu December ni 2, chawhma dar 10:00 ah neih a ni ang.
Post a Comment