October 10, 2023 : Vawiin khan DC Conference Hall, Lawngtlaiah MLA inthlanpui kalpuina tura mawhphurhna hrang hrang nei te hnenah vawiin khan training pek an ni.
Pi Margaret J. Vanlalremmawii, SDO (S) kaihhruia he training hunah hian Election Expenditure Monitoring Team, Flying Squad Team, Static Surveilance Team, Video Surveilance Team, Video Viewing Team leh Account Team-te an tel a ni.
Pi Margaret J. Vanlalremmawii, SDO (S) chuan MLA inthlanna felfai kalpui a nih theih nan inpuahchahna tha neih a pawimawh thu sawiin, chanvo hrang hrang nei ten an mawhphurhna an hriat chian lehzual theih nan Training chu uluk tak a tel turin leh an thil hriat loh te zawh fiahna hun tangkai a hmang turin kalkhawmte a chah a. Mahni mawhphurhna theuhte tha tak a hlenchhuak thei turin a fuih bawk a ni.
Lawngtlai district-ah hian Voter 91439 awmin 36-Tuichawng Assembly Constituency-ah voter 36042 an awm a, 37-Lawngtlai West ah voter 29493 awmin 38-Lawngtlai East ah voter 25904 an awm bawk a ni. Voter awm zat atanga 45685 chu mipa an ni a, 45754 chu hmeichhia an ni a. Lawngtlai district-ah hian Service Voter 232 awm anga chhinchhiah a ni bawk.
Training hi Pu Chinlianmanga, Sangau SDO (C), Pu Collin Hlychho, BDO, Lawngtlai leh Pu PL Hrangkhama, Nodal Officer for Expenditure Monitoring-ten an pe a ni.
Post a Comment