October 4, 2023 (Rauthla) : Vawiin, 4.10.2023 khan Bungtlang South Zone Football Association buatsaih Lawngtlai West MLA Cup 2023 Final khelh a ni a. Lawngtlai District Football Association Sr. Vice President Pu Elvis Lalthangzuala chuan khuallian niin hun a hmanpui.
Khuallian chuan infiammite’n a nawmna ringawt ni lo, hlawhtlin tum theihtawp lan chhuah a ngai a. Chutiang tur chuan mahni inthununna kan neih a ngai a ni, a ti a. Football lam tui mite’n tournament hlawhtling taka kan khelh theihna tura Bialtu MLA in ruahmanna a siam thei chu lawmawm a tih thu a sawi a. Infiammite hmakhua ngai a, sum leh pai tam tak sengtu Village Council te inpeknaah lawmthu a sawi bawk.
Pu Elvis Lalthangzuala chuan Insumtheihna, thawhrimna, taimakna leh terei peihna nei lo tan hlawhtlinna kawng a neih theih loh tih hria a. Theihtawp chhuah turin player te chu a chah bawk a ni.
Tun tum Bungtlang South Zone Football Association te buatsaih MLA Lawngtlai West Football Tournament-ah hian Village Council sawm pahnih (12) khelin, Leaque match a khelh niin, match 24 an khel a. Final match ah hian Bungtlang South VC team leh Diltlang South VC team ten an khel a. Bungtlang South VC team te hi 1-0 in hnehna changin an Champion ta a ni.
Champion Team hian Rs. 30,000 , Trophy leh Gold Medal an dawng a. Pahnihna hian Rs. 15,000 leh Silver Medal an dawng bawk a ni. Mimal chawimawina dawngtute hi Top Scorer atan goal 7 khungtu K. Lalmuanpuia, M. Kawnpui VC Team, Best player-ah Malsawmkima, Bungtlang South VC team leh Best Goalkeeper-ah Lalramhmingmawia, Bungtlang South VC team te an ni.
Khuallian hi Pu Edwin Lalhuliana Hlichhal, LDFA Hon. Secretary-in a tawiawm bawk a ni.
Post a Comment