Vawiin YLA Day denchhen hian hriat theih chinah Branch hrang hrang ten infiamna (Section Sport/Kawtthler Sport) an nei a, Branch thenkhatin khawchhung leh hmun pawimawh laiah hnatlang neiin, branch thenkhatin mi harsate tanpui nan YLA Day hi an hmang bawk a. Branch thenkhatin an veng thlanmuala tutih hriat loh an phum thlanlung an phunsak.
Vawiin YLA Day hian Central YLA hruaitute chuan Lawngtlai khawchhunga damdawiin pathumah leh Lairam Rescue Centre-ah tanpuina an hlan a, Lawngtlai khawpui chhunga YLA Day hmang branch te an tlawh kual a. CYLA Fin. Secretary Pu T. Rohlupuia’n Tuithumhnar Group in YLA Day an hman chu khuallian niin a hmanpui.
Kan ram hruaitute Deputy Speaker Pu H. Biakzaua, Lawngtlai West bialtu MLA Pu C. Ngunlianchunga leh LADC CEM Pu V. Zirsanga ten YLA Day chibai bukna thuchah sawiin, Lawngtlai Deputy Commissioner pawhin YLA din champha chibai bukna thuchah a sawi bawk.
YLA hi kum 1974 khan din a ni a, Founder chu Pu F. Lalhulha, Sangau a ni. Tunah hian YLA member zawng zawng zat hi 56000 a ni a, Branch 115 awmin, Group YLA 2 a awm a, Sub-Hqrs. 7 a awm mek bawk.
YLA Founder Pu F. Lalhulha chuan YLA member zawng zawngte chibai bukin, YLA hi kum 1974 ah din a ni a, chuta tang chuan tluang takin vawiin thleng hian a kal a. Branch te leh Section te inpekna a vawiin ni thleng a a kal hi kal hi ka lawm em em a ni tih hi kei F. Lalhulha, YLA Founder hian ka sawi duh a ni, a ti a. YLA hi kan Ram leh kan Hnam tan a din a ni a, kan ram chhan a ngaih pawha mihrang leh sa hrang ni tura YLA hi din a ni. Kan ram chhung leh ram pawnah pawh tanpui ngai apiangte tanpuitu tur atan YLA hi a ding bawk a ni, a ti.
Pu F. Lalhulha chuan, kan Pathian min venna leh min enkawlnain YLA in hna a thawk zel ang. Hlawh leh hlam neia thawk kan ni lova, in pumpek a har hle thin, Chutichunga hlawh leh hlam awm miah lova inpete hi Ram leh Hnam a inpe tak tak te an ni, a ti a. Kan hnam hi hnam naupang kan ni lova, hnam Upa tak kan ni tawh a, kan hnam a upat angin hmalam kan pan zel a pawimawh a ni. YLA hi kan hnam leh kan ram tan a din a ni tih i hre thar leh ang u, a ti bawk.
Post a Comment