September 22, 2023 (Rauthla) : Zanin khan YLA Bethel Veng Branch te chuan YLA Day vawi 49-na lawmna chi khat atan a Section Sports 2023 an buatsaih chu ṭanin, Govt. Primary School-ah a hawnna hun an hmang a. Pu Elvis Lalthangzuala, Vice President MJA Lawngtlai District chu khualzahawm niin Section Sport hi a hawng.
Pu Elvis Lalthangzuala chuan Thalaite/YLA member-te puala intihhlimna hun hmanga YLA Day hman a ni tur chu lawmawm a tih thu sawiin, hei hian keimahni inkarah inunauna tha tak thlentu leh khawtlang tana ke penna kawnga inlungrualna pe tu anih ngei theihna turin duhsakna a hlan.
Khualzahawm chuan YLA chu tlawmngai pawl a nih angin khawtlang inrelbawlnaah pawh midangte tih bak piah lama tlawmngaihna lan chhuah tirtu kan nih zel a pawimawh hle tih sawiin, kan khawtlanga harsa zawk te leh nu nau zawkte thlamuantu kan nih zel a pawimawh a ni, a ti.
YLA chu kan hnam ziarang humhalhna kawnga hmalatu langsar ber a nih thu sawiin, kan hnam lam te, kan hnam tawng te leh kan incheina zahpui lo turin YLA member-te a chah a. Kan hnam nihna hi tawng kan thiam lo a nih pawhin incheina hmang talin kan tilang tur a ni, a ti.
Lawngtlai District-ah hian kum 2004 Khan HIV positive hmuhchhuah ani a. Thisen test zawng zawng hi mi 28425 niin, HIV postive an hmuhchhuah tawh zawng zawng hi 521 a tling ta reng mai. Kumin chhung hian (Jan - Aug) khan HIV positive hi mi 67 zet an hmuhchhuak tawh bawk. Kan dinhmun hi a ṭha vak lo hle. Kan nun kan uluk a, kan fimkhur a ngai hle bawk. Mipat hmeichhiatna hman sualna kawngah leh ruihhlo lakah kan fihlim a ngai a ni. a ti bawk.
Section Sport hi item hrang hrang hmanga neih a ni a, naktukah chhunzawmin, inrinni zanah a kharna neih a ni ang. YLA Bethel Veng Branch hi Section hnih; Dokulha Section leh Hausata Section ah inṭhenin, member zawng zawng hi 360 an ni.
Post a Comment