Lawngtlai 25.09.2023 : Vawiin khan Lawngtlai District Deputy Commissioner Office Chamber- ah Pu R.Khawlliana (88) S/o Dartlinga (L), AOC Veng, Lawngtlai hnenah India rama civil mite tana huaisenna chawimawina sang ber Jeevan Raksha Padak Award 2022 hnuaiah Citation leh medal hlanna hun hman a ni.
He huaisen chawimawina in a ken tel Citation leh Medal hlantu Lawngtlai District Bawrhsap Pu H.Lalhmingthanga chuan mi ropuite chawimawina hun hman a ni thei chu lawmawm a tih thu a siaw a. Lawngtlai District chhunga India rama civil mi, mi huaisen te tan a chawimawina sang ber dawng thei an awm chu a lawmawm in a ropui a takzet a ni, a ti.
Bawrhsap chuan hetiang a chawimawina sang tak dawng theih tura hma laksaktu khawtlang hruaitute chu fakawm a tih a sawi a. Hetiang chawimawina dawng thei hi an vang hle a, mahni duhthu a dawn ngawt theih anih loh thu leh mi vannei leh mi huaisen te tan chauh a ni a. A District ang zawng pawhin kan lawmpui thiam a, kan ngaihsan thiam pawh a tul hle ani, a ti bawk.
Vawiin hian Pu R.Khawlliana hi stroke avanga enkawl mek niin a chawimawina lawmman hi a fanu Pi R.Vanlaldiki hnenah hlan ani. Tangka fai erawh August 21,2023 khan Cheque a hlan ani tawh bawk
He chawimawina inkhawm ah hian Pu C.Laltluanga’n chhungkaw aiawhin thusawin a nei a. Pu R.Khawlliana hian kum upa lam tawh a ni a. Tunah hian a stroke avangin amah pawh a rawn tel thei lova. Midangte nun chhan thei tu dinhmuna a ding hi chhungkua pawh kan lawm hle a. Tin, India rama Civil mite hnena chawimawina sangber hlan a nih theihna turin hma min laksaktu Khawtlang hruaitute leh sorkar lama mi pawimawh tak tak te chungah lawm thu kan sawi a ni, a ti a. Hetiang chawimawina a dawng hi a ni pawh a lawm hle a, a ti.
Pu R.Khawlliana hian Ni 27.Ocotber, 2021khan an kawmchhaka Power & Electricity Department ten Transformer an dah siamthat tuma hnathawkmek AOC Veng, Lawngtlai Pu H.Lalrinchhana chu Current in manin, Pu R.Khawlliana hian mautlawn hmangin a chhanchhuak a ni.
Jeevan Raksha Padak Award hi India ramin mi huaisen te, hun leh hmun harsa tak kara mahni nunna hial thapa midang nunna chhanchhuaktute hnen a a hlan thin a ni a. Award hian Medal, Citation leh Pawisa fai cheng 100000 a keng tel a ni.
Vawiin Medal leh Citation hlanna puala inkhawm hi Pu Abraham Beirazi Khithie, Addl. DC chuan kaihruaiin, Lawngtlai DC office staff te, AOC khawtlang hruaitute leh Lawngtlai District MJA te an tel a ni.
Post a Comment