September 8, 2023 : Vawiin khan LADC Adult Education Wing buatsaihin Rev. Thanzinga Memorial Middle School, Chawnhu-ah International Literacy Day hman niin, Pu Andrew Laltlanzara, EM M/S, LADC chuan khuallian niin a hmanpui.
Pu Andrew Laltlanzara, EM M/S, LADC chuan International Literacy Day chu kum 1966 atanga hman tan a lo nih thu a sawi a, hetiang programme hman a nih theihna tura ruahmanna siamtute chungah lawmthu a sawi. Khuallian chuan kum 2011 Mizoram chhiarpuiah ziak leh chhiar thiam tehnaah Mizoram chu pathumna (91.58%) kan nih thu te, Mizoramah chuan Serchhip District chu ziak leh chhiar thiamna lamah pakhatna niin, Lawngtlai District chu a hniam ber kan nih thu a sawi a. Kan hniamna chhan chu chhuanlam tur tam tak awm mahse, tun ai hian zirna kawngah tan kan lak a ngai hle tih a chiang a, a ti a Zirtirtute pawhin hei hi an mawhphurhnaa ngai a, hlawhlakna atan chauha thawktu rilru pu lova, zirna kawnga hmasawnna a awm theih nan theihtawp chhuah thar leh turin a chah.
Khuallian chuan puitling ziak leh chhiar thiam lo ten ziak lehchhiar an thiam theih nan LADC Adult Education Wing in hma a la thin tih sawiin, ziak leh chhiar thiam tlemna thingtlang khuaah te pawh zirtirna pe turin Instructor engemaw zat chhawr mek a nih thu sawi a bawk a. 'Zirtirtu thenkhat aikal chhawr ching kan awm thin hi a pawi hle a, hetiang mite hian an sim pawh a tha a, khawtlang pawhin hetiang tihchingte hi kan dem ngam pawh a hun ta hle a ni' a ti.
He hun hi Pu C. Sangthanzuala, DCAEO, LADC chuan kaihruaiin, Pu C. Lalthlamuana, Asst. Professor, Govt. Lawngtlai College in Adult Education kalphung leh a pawimawhna chungchang a sawi a, Pu F. Lalhmachhuana, EEO M/S, LADC in kalkhawmte hnenah lawmthu sawina hun a hmang bawk.
Post a Comment