September 8, 2023 : Home Minister Pu Lalchamliana'n Saituala Deputy Commissioner of State Tax Office a hawnnaah Mizoram chu ram naupang tak mahni a la intodelh lo a nih thu sawiin, Mizoram hmasawn leh than zel nan Sawrkar leh mipuiin tih tur kan nei ve ve, a ti.
Deputy Commissioner of State Tax Office hawnna inkhawm, vawiina Saitual College Auditorium a neih ah hian Home Minister chuan Taxation Department chu Mizoram a Revenue Tax chhunluhna bulpui a ni a, Department hian GST, GST huam loh Petroleum Tax, VAT leh Professional tax atangin chhiah a la thin a ni, a ti. Minister chuan intodelh pawimawh zia sawiin 2020-2023 a revenue hmuh cheng vaibelchhe 1020 chu a san ber tum ni mahse Mizoram sawrkar in sum a hmanchhuah tur zawng zawng atanga teh chuan te tham tak a la ni rih a ni, a ti. Mizoram ah income tax kan pek ve loh thu sawiin , sawrkar in mipuite mamawh tur phuhruk nan pawisa tamtak a sen a ngai a, Fair price shop atanga buhfai lei tur chhawpchhuahte leh electric bill te chu sawrkar in hmun dang atang man sang zawk a a lei, mipuite tan tlawm zawk a a hralh chhuah a ni a, chutah chuan sawrkar in sum nasa tak a seng thin a ni, a ti.
Pu R Zosiamliana commissioner of state tax in report pe in Taxation Department chu May 20, 1988 ah department hran a ding tan in Mizoram a revenue chhungluttu lian ber a ni, a ti a. Tun dinhmunah Commissioner of State Tax hnuaiah Zone sawmpali - Aizawlah zone pali leh District dang 10 ah zone pakhat theuh Deputy Commissioner kaihhruainain an awm mek a ni.
Post a Comment