September 28, 2023 (Rauthla) : Vawiin khan Lawngtlai District Football Association (LDFA) hnuaia Women Committee leh Grassroot Committee buatsaihin LDFA Cup 2023 khelh ṭan a ni a, LDFA Cup 2023 hi category pathumah then niin, Women, Under-12 leh Under-14 te an ni a. Tournament hi LWA Gen. Hqrs; Lawngtlai ten an sponsored a ni.
Inkhelh tan hmaa programme tawi buatsaiah Khuallian Pi Vankungpuii, Gen. Secretary, LWA Gen. Hqrs; Lawngtlai chuan LWA leh LDFA ten football tournament an buatsaih chuan rah tha a chhuah a beisei thu a sawi a, Lawngtlai football-ah hian talent nei tha tak tak, inphum ru an awm a, chumi te talent hai chhuah chu kan tum pakhat a ni a, kan ram kan hnam tihmingtha a, chawimawitu an nih hi kan beisei tlat a ni, a ti a. A thiamte phochhuah hi kan tum a nih avangin nikum lamah pawh LDFA nen football tournament kan buatsaih a, LWA hian football hmasawna a ngai pawimawh em em a ni, a ti.
Pi Vankungpuii chuan miin ei zawn nan infiamna an hmang thei a, keini Laifate pawh hian kan thei ve a ni, a ti a. Zirna kan tih rualin sorkar hnain min daih lo, infiamna hmangin chhungkua kan chawm thei a, chumi tur chuan kan inbuatsaih a, min tibuai theitu ruihhlo laka kan fihlim a ngai a ni, a ti bawk.
Programme tawi hman hi Pu S. Lalrinsiama, LDFA Vice President in kaihruaiin, Pu Lalramengzauva, Secretary, Grassroot Committee, LDFA in hunserh a hmang a, Pu VL. Hmangaihzuala, Secretary, Women Committee, LDFA in report a pe bawk.
LDFA Cup 2023 ah hian Women bikah team 9, Under - 12 ah team 16 leh Under - 14 ah team 11 te an tel a. Final hi October 5, 2023 ah CYLA PLayground, Lawngtlaiah khelh a ni ang.
Post a Comment