September 22, 2023 : Hmeichhiate venhim leh an dinhmun chawikan kawnga hnathawk tha chawimawina, Zakapa Award, 2023 chu vawiin khan Chief Minister Pu Zoramthanga'n Dr. Lalrinawmi Ralte hnenah a hlan a, he award hian thuziak (Lehkhapui) bakah pawisa fai Rs. 100000 (nuai khat) a keng tel a ni.
Khuallian Pu Zoramthanga chuan, Zakapa Award buatsaih a ni hi a ropui ka ti a, Mizo hmeichhiate chhan tura engkim chan huam lal Zakapa hi zofaten hrerengin, huaisen takin a hnung hi i zui ang u, a ti.
Er. Lalrinawma, Minister, Social Welfare & Tribal Affairs Department, Zakapa Award Organising Committee Chairman ni bawk chuan khuhhawna thu a sawi a. Zakapa Award, 2023 a hlawhtlin theih nana thawktute zawng zawng chungah lawmthu sawiin, a thih hnu kum za leh sawmthumah hmeichhiate humhimtu lal ropui Zakapa hriatrengna leh chawimawina kan nei hi a hlu ka ti a. Tlai tawh hle angin lang mahse a hnathawh ropui tak avang khan a hming hi Pathianin a bo pil a phal lova, tunah ropui takin a lo vul leh ta a ni, a ti.
Pu David R. Lalsawmtluanga, Member, Organising Committee chuan lal Zakapa'n kum 1891 kumtir lama South Lushai Hills Superintendent CS Murray-a'n Khawhri khuaa nula a phutna huaisen taka "kan hnam dan a ni lo" tia a lo hnial dan leh an indo zui dan chanchin tawi sawina a nei a ni. Zakapa hi Fanai lal Dokhama, Sailulak lal fapa niin 1839 ah a piang a ni.
Lawmman dawngtu tur an thlan dan leh a dawngtu Dr. Lalrinawmi Ralte chanchin tawi Pi Zoramthangi, Director, Women & Child Development leh Member Secretary, Organising Committee chuan a sawi a. Tehfung pawimawh tak tak sawm an neih thu a tarlang a, chu tehfung atang chuan a dawngtua an thlan tak Dr. Lalrinawmi, Tlangnuam hi a rawn lang fiah hle a ni, a ti. Dr. Lalrinawmi Ralte hian Mizoram pawn lama Mizo hmeichhia harsatna tawkte chhanchhuahna hna vawi tam tak a lo thawk tawh thin a ni.
Post a Comment