August 2, 2023 (Rauthla) : Nimin, August 1, 2023 khan Tisopi lei (Bareilley Bridge) dawh dan tur chungchang sawiin, Pu H.C. Lalmalsawma Zasai leh Garden Reach Ship Builders & Engineer hotupa Pu CV. Srinivas chu Kolkata Mizoram House-ah an inkawm.
Amotla bialtu MDC Pu H.C. Lalmalsawma Zasai hian a hmain Tisopi lei dawh chungchang hi Chief Minister a lo sawipui tawh a, Mizoram sawrkar atangin Ist Installment atan Rs 1.5cr pek a ni. Foundation civil work zawh veleh Thir lei (Bareilley Bridge) hi Company lam hian an rawn dah/ dawh a ni. He Lei hi Motor lian pawh zawh thei tura ruahhman a ni. Breilley bridge structure hi Kolkata atanga rawn phurh chhoh tur a ni a. Thla khat chhunga thawh zawh hman an inbeisei thu CRSBE hotupa chuan a sawi bawk.
Tisòpi lui hi Siaha leh Lawngtlai inkara awm a ni a. Tisòpi lui ral lamah hian Siaha District khaw-4 T. Ferry, Riasikah, Amòtlah leh Thiahra khuate an awm a ni.
He lei hi heng khua palite tan hian an Life line pawimawh lutuk a ni a. Kum tin hian fur laiin tui lianin thing lei (seasonal bridge) an siam hi a tichhe ziah mai a. Heng khaw palite mipuite hian harsatna tam tak an tawk thin a ni. Kum tinin thing lei (Seasonal bridge) dawh ziah a ngai thin a. Thal laiin R. Beinò (Kolodine river) hi seasonal bridge dawh kai thin a ni a. Tui chhak lama khaw awm zawngte chuan Siaha to Lawngtlai inkar kal nana an hman ber thin a ni. Chumi avang chuan, he Tisòpi lei hi heng khua-4 te tan chauh hian a pawimawh a ni mai lo va. Siaha District a khaw awm zawng zawngte leh Lawngtlai-E a khaw awm zawng zawngte tan a pawimawh em em a ni.
Post a Comment