Vawiin thutkhawmah hian zawhna leh chhanna hun hman a nih hmain MDC lo ni tawh nunna chante Pi N. Sangnawni leh Upa H. Alchunga sunna hun hman a ni a. Pi N. Sangnawni hi kum 1958 ah M. Kawnpuiah a piang a, kum 2015 MDC election-ah Kawnpui bial atangin MDC atan thlan tlin a ni a, Town Committee Chairman a ni. Hmeichhia zinga elected MDC hmasa ber niin, May 19, 2023 khan ropuina ramah a chawl ta a ni.
Upa H. Alchunga hi kum 1950 ah Bualpui NG ah a piang a. Kum 2002 ah leh 2005 a MDC election neihah Bualpui-NG West atangin MDC atan thlan tlin a ni a, LADC sorkarah Vice Chairman, Planning & Development leh EM te a lo ni tawh a ni. July 10, 2023 khan ropuina ramah a chawl ta a ni.
Vawmbuk bialtu MDC Pu T. Zakunga zawhna chhangin, Pu V. Zirsanga, CEM LADC chuan 2nd Mizoram Finance Commission in LADC tan sum engemawzat chu min ruahman sak ngei ka ring a, recommendation pawh an submit tawh a, a zat erawh kan la hre lo, a ti.
AOC bialtu MDC Pu LR. Dingliana'n LADC hnuaia Primary leh Middle School zirtirtute aikal chhawr phalsak an ni em tih leh aikal chhawrna rate Executive in a bithliah em tih a zawhna chu Education (P) changtu EM Pu L. Daniala chuan LADC hnuaia Primary leh Middle School zirtirtu te chu LADC a Education & Human Resources Department chuan aikal chhawr hi a hranpain a phalsak lo tih sawiin, aikal chhawrna rate chu LADC Executive in a bithliah loh thu a sawi bawk. Pu L. Daniala chuan sorkarin aikal chhawr an awm ngei tih a hriat thu a sawi a, 'kan zirna atan leh zirlaite tana tha zawk nia kan hriat avangin aikal chhawr hi mit kan siai khum ta mai a ni' a ti.
South Lungpher bialtu MDC Pu C. Lalmuanthanga zawhna chhangin Pu V. Zirsanga, CEM LADC chuan tun sorkar lai lai mekin Political Adviser a ruat thu sawiin, Political Adviser hi LADC a Adviser to CEM nilai rank leh status ang pek a ni a, official duty-a a chhuahin official motor leh driver a hmang thei bawk tih sawiin, TA/DA pawh a bill theih thu a sawi bawk.
Vawmbuk bialtu MDC Pu T. Zakunga zawhna chhangin, EF&CC department changtu leh CEM ni bawk Pu V. Zirsanga chuan Phawngpui National Park leh Ngengpui Wildlife Sanctuary te chu Mizoram sorkarin LADC kutah a la hlan fel loh thu a sawi.
Vawiin session-ah hian zawhna panga (5) awmin, pali (4) chhan a ni a, pakhat hi zawhna neituin a withdraw a, Official Bill 4 awmin Pu V. Zirsanga CEM chuan a introduced a, chungte chu.
1. The Chief Executive Member to introduce the following Official Bills:-
(i) The Lai Autonomous District Council (Salaries and allowances of Chief Executive Member and Executive Members) (Second Amendment) Bill, 2023.
(ii) The Lai Autonomous District Council (Salaries and allowances of Chairman and Deputy Chairman) (Second Amendment) Bill, 2023.
(iii) The Lai Autonomous District Council (Salaries, allowances and pension of Members) (Third Amendment) Bill, 2023.
2. The Executive Member i/c LAD to introduce an Official Bill.
(1) The Lai Autonomous District Council (Village Councils) (Fourth Amendment) Bill, 2023.
Heng Official Bill introduced tak te hi naktuk Dt. 2.8.2023 chawhnuah sawiho a ni ang.
Post a Comment