August 23, 2023, Lawngtlai : Lawngtlai District Bawrhsap leh District Education Committee Chairman Pu H. Lalhmingthanga kaihhruaina hnuaiah vawiin khan September 5,2023 a Teachers’ Day hman dan tur DC Conference hall ngaihtuahin an thukhawm.
Pu H. Lalhmingthanga chuan, India President hlui, zirtirtu ropui Dr S.Radha Krishnan-a pianchamphaphak September 5-ah ‘Teachers’ Day’ chu lawm a nih thin thu leh he ni hi kan ngaihpawimawh thar fo a tul ani, a ti a. Zirtirtute chawimawina Ni tur anih avangin, zirtirute pawh chawimawi phu a hna kan thawh thin a ngai, a ti bawk.
Pu H. Lalhmingthanga chuan, zirtirtute chu kohhran leh khawtlang tan pawh a mi tangkai leh a khai dingtu ber an nih avangin nun uluk a ngai thu leh chawimawi tlak a nun an hman a ngai thu sawiin Teacher Day hlim leh lawm taka hman anih theihna turin zirtirtu kal khawmte chu duhsakna a hlan bawk ani.
Teachers Day hman dan tur ngaihtuahhonaah hian kum dang anga an tih thin angin he Ni hi Lawngtlai District chhunga Zirna In zawng zawngin anmahni remchan dan angin anmahni school theuhah hman ni se tiin meeting chuan a rel a. Hemi niah hian Mizoram Sawrkar School Education Minister Teachers Day thuchah chu school tinah chhiar chhuah ni se, tih a ni a. Hemi bakah hian Lawngtlai District Bawrhsap Pu H.Lalhmingthanga pawhin Local cable TV kaltlangin thuchah sawi se, tih a ni a. Hemi a Social Media hrang hrang a tarlan turin ‘Teachers’ Day’ puala Flyer buatsaih leh khawpui chhungah Teacher Day banner hmun paruk ah tar nibawk se, tih a ni.
Tin, hemi bakah hian State Level Working Committee in a lo ruahmanna angin kumin hian National Foundation of Teacher Welfare Fund atan zirtirtu pakhat hnenah Rs. 200 theuh khawn nise, tih a ni a. Heng sum an khawm te hi zirtirtu dam lo leh harsatna tawkte tanpuina atan hman anih thin thu ngaihthlak ani.
Post a Comment