July 19, 2023, Lawngtlai : Lawngtlai District Level Committee on Saansad Adarsh Gram Yojana (SAGY) chu Lawngtlai DRDO Project Director Pi Marilyn Rualzakhumthangi hovin vawiin khan Lawngtlai DC Conference Hall-ah an ṭhu khawm a. SAGY hnuaia Model Village atana Member of Parliament (Rajya Sabha) Pu K. Vanlalvena'n a thlan, Pangkhua tana kum 2023-2024 chhunga hmasawnna hna thawh dan tur, village level development action plan an ruahman.


Chairman Pi Marilyn Rualzakhumthangi chuan SAGY chungchang leh Rajya Sabha MP-in model village atana Pangkhua a thlan hnua hma lakna kalpui dan te a tar lang a. Bialtu MDC Pu BN Thangpuia chuan Pangkhaw dinhmun tar langin, Pangkhua chu SAGY Model Village a nih anga hma a sawn theih nan ṭhahnem ngai taka hma laksak turin line department-te chu a ngen a ni.

He hunah hian model village Pangkhuain a mamawh hrang hrangte leh he khaw tihhmasawn nana line department hrang hrang hnuaia kum 2023-2024 chhunga hma lakna kalpui theih tura ngaihte sawi ho a ni a. Department-te hma lakna tur hrang hrang intuk niin, he'ng ruahmannate hi a hlawhtlin theih nan department-te'n uluk takin vil zui se, tih a ni.

Pangkhua hi Rajya Sabha MP Pu K. Vanlalvena'n SAGY phase-VIII hnuaia Model Village atana a thlan a ni a. Model village hawnna hi January ni 28, 2022 khan hman lo ni tawhin, hma lakna pawh eng emaw chen kalpui tawh a ni a. Kumin hian hmalakna pui kalpui tura ruahman a ni.

He hunah hian Lai Autonomous District Council (LADC)-a Executive Member i/c Art & Culture Pu BN Thangpuia, Sangau East bialtu MDC leh Lawngtlai District-a line department hrang hrang hotute an tel a ni.

Post a Comment

Powered by Blogger.