July 24, 2023 (Rauthla) : Vawiin khan Lawngtlaia tlawmngai pawl hrang hrangte huaihawtin Manipur buaina a Tlangmite thlavang hauhna kawngzawh, Lawngtlai ah neih a ni a, ruahmanna siam angin Lawngtlai veng hrang hrang atangin mipui ten kawng an zawh a, kawngzawha tel te chuan Manipur a hleilenna thlengmek an dem thute, remna leh muanna awm se an duh thute, hmeichhiate rahbeh a, rawngtaka an chunga chetna thleng an dem thute thuziak kengin an aupui a, Lawngtlai Bazar Venga Areopagy ah inkhawm tawi buatsaih a ni.
He huna thusawitu CYLA GS Pu Joseph Lalhmingthanga Chinzah chuan Mizote chu lu la hnam (Head Hunters) ti a hriat thin kan ni, Mahse, pi leh pu te hunlai pawhin ral beih na emaw khaw runnaah pawh hmeichhia leh nunau bakah pitar putar te kut an thlak ngai lo, vawiin niah Meitei hote erawh chuan kan thisen zawmpui unau te chungah an thlak a, an sawisa nasa hle, a ti a. Ram ran din tumin hma la thin mahila, tunah chuan India ram Constitution hnuaiah Indians ni turin thu kan thlung tawh a. Mahse, vawiinniah hian PM leh Central hotute hian fahrawn enkawlin min enkawl emaw ti mai turin NE State te dinhmun, a bik takin Manipur State te hi min lo ngai anih chuan kum tam tak liam ta angin kan unau te chhanchhuah nan leh kan thisen zawmpui te tanpuinan Silai kan kengkawh lovang tih hi a sawi theih loh ani, a ti.
CYLA GS chuan President of India pawh a ngawi rei mah mah tawh tih sawiin, Hnam hnufual bik te hmakhaw ngaiin a tawngchhuah a, hma a lak tak tak hun tawh, a ti a. P.M Modiji pawhin vawiin ni a kan unau te tuarna hi hria sela, rang thei ang berin boruak ralmuang tak a awm theih nan hma la nghal rawh se, a ti bawk.
Vawiina Lawngtlai a Manipura tlangmite thlavang hauhna kawngzawh ah hian tanpuina bawm dawh a ni a, he hun a telten a huhovin Pathian auvin, Manipur a tharum thawhna a tawp theih nan Pathian hnen ah an dil.
Manipur-a tharum thawhna thleng vanga tlangmite thlavang hauhnaah hian Young Lai Association, Lai Women Association leh MHIP aiawh ten thusawiin, Manipur-a hleilenna rapthlaktak thleng chu an dem thu uartakin an sawi a, Central Sorkar leh Manipur Sorkar chu tharum thawhna titawp tura an duh thu leh Kristian te tawrhna chu India danpui bawhchhiatna a nih thute sawi lan a ni.
Post a Comment