June 13, 2023 (Rauthla) : School Education Minister Pu Lalchhandama Ralte leh LADC hotu ten vawiin khan LADC CEM's Conference Hall-ah meeting an nei.
LADC CEM Charge la mektu Pu C. Rongura, Executive Member i/c LAD kaihhruai meeting-ah hian Pu Lalchhandama Ralte chuan LADC in tun hma atanga a lo buaipui thin Provincialised Middle School 18-te LADC kuta hlan chungchang chu Mizoram sorkarin a thuphungin a remti tih sawiin, service kaihhnawih leh sum leh pai khawih thil a nih avangin duh angin hma a lak chak theih loh tih a sawi a. LADC hotu ten Provincialised School 18 hnuaia zirtirtute awm dan tur leh a kaihhnawiha thil tul (Terms & Conditions) te lo buatsaihin a rang thei ang berin Mizoram sorkarah thlen se. A tul anga chak taka hma lak dun chhoh zel nise, a ti.
Meeting-ah hian Provicialised School 18-a thawktute chu LADC-a luh an duh leh duh loh (willingness) zawh mek an nih thu DEO lam atanga report a ni a. LADC hotute chuan Dual Administration-in zirlaite a tha lo zawnga a nghawng nasat avangin chinfel sak thuai turin Education Minister hi an ngen a ni.
He Meeting-ah hian, LADC Chairman, Executive Member te, Official pawimawhte bakah MSTA hruaitute leh LSA hruaitute leh sawmbik mi engemawzat an tel a ni.
Post a Comment