June 1, 2023 (Rauthla) : Union Home Minister Amit Shah chuan central sorkarin Manipur-ah remna leh muanna awm se a duh tih sawiin, buaina chhuah chhan chhui a ni dawn tih a sawi bawk.
Imphal-a vawiina chanchinbu mite a kawmnaah Amit Shah chuan Manipur buaina chhuah chhan chhui turin Peace Committee din a ni dawn tih sawiin, chu committee chu High Court judge hlui kaihhruaina hnuaiah a awm dawn tih a sawi a. CBI special team te pawhin buaina thlen dan leh a kaihhnawihte an chhui dawn tih a sawi bawk.
Union Home Minister chuan thil thlen dan chu awn lam nei lovin chhui chhuah a ni dawn tih sawiin, buaina thlen chhana mawhphurtute chu hrem ngei an ni dawn tih a sawi a. Manipur buaina avanga boral chhungte hnenah cheng nuai 10 theuh pek a nih tur thu a sawi bawk.
Amit Shah chuan Manipur buaina avanga tuarte enkawl turin central sorkar chuan medical team riat a ruahman tih sawiin, team nga ten Manipur thleng tawhin, team thum te chu kawng lakah an thang mek, a ti.
Post a Comment