June 21, 2023, Lawngtlai : Remna Ni 2023 lawmna pualin Mizoram Sawrkar General Administration Department, Education Department, Lawngtlai Deputy Commissioner leh Lawngtlai District Samagra Shiksha te ṭang ho huaihawtin vawiin khan LADC Hall, Lawngtlaiah Lawngtlai District chhunga high school (HS) zirlaite tan quiz competition buatsaih a niLawngtlai Bawrhsap Pu Abraham Beirazi Khithie chuan khuallian niin he hun hi a hmanpui.


Khuallian chuan midang nena inelna thianghlim chuan a ṭha zawnga hmasawnna a thlen ṭhin tih sawiin, Inelna leh chona hmachhawn ngamte chu an thil tih-ah an hlawhtling nge nge ṭhin tih sawiin, quiz-a telte chu hlawhtling ngei turin duhsakna a hlan a ni.

Pu Abraham Beirazi Khithie chuan kan ram thenawm Myanmar, Bangladesh leh Manipur ten harsatna namen lo an tawh avangin, Mizoramah raltlan thahnem tak an awm mek tih a sawi a. Heng raltlan ten Mizoram an rawn panna chhan chu kan ram a ralmuan vang a ni, a ti a. Ram ralmuangah hmasawnna hrang hrang a thleng thin tih sawiin, zirlai naupangte chu hmathlir leh tum mumal tak nei a, an zirlai bakah midangte nen a an inkarah remna siamtu an nih zel a duh thu a sawi bawk.

Remna Ni 2023 puala Lawngtlaia high school zirlaite tana quiz competition buatsaihah hian Pi L. Vanchhawng chu quiz master niin, high school zirlai aṭangin team 12 an tel a. "Political History of Mizoram (1947 to 1987)" tih thupui hmangin quiz hi buatsaih a ni.

Quiz competition-ah hian Downtown English School chu pakhatna niin, pahnihna Don Bosco School leh pathumna Vista English School te an ni a. Lawmmanah thuziak bakah, pakhatna tan ₹ 30,000/-, pahnihna tan ₹ 20,000/- leh pathumna tan ₹ 10,000/- te ruahman niin, lawmmante hi June ni 30-a Lawngtlaia Remna Ni lawmna hunah sem a ni ang.

He quiz competition-a pakhatna team hi June ni 27, 2023-a state level inelnaa tel turin Lawngtlai District ai awhin Aizawlah an kal dawn bawk a ni.

Post a Comment

Powered by Blogger.