June 21, 2023, Lawngtlai : Mizoram Sawrkar General Administration Department, Education Department, Lawngtlai Deputy Commissioner leh Lawngtlai District Samagra Shiksha te ṭang ho huaihawtin nimin khan Remna Ni 2023 lawmna pualin Government College Veng High School-ah Lawngtlai District chhunga higher secondary school (HSS) zirlaite tan essay inziahsiak buatsaih a ni.

Samagra Shiksha, Lawngtlai District-a Deputy District Project Coordinator Pu S. Lalrinsiama chuan essay inziahsiak buatsaih a nih chhan leh essay inziahsiaka tel tura kalte lawmna thu a sawi a. Government Lawngtlai College-a Assistant Professor Pu M. Lalramdina chuan essay inziahsiaka hriat tur pawimawhte a sawifiah a. Hemi hnu hian "Political History of Mizoram (1947 to 1987)" tih thupui hmangin essay inziahsiak chu ṭan a ni.

Remna Ni 2023 puala Lawngtlaia essay inziahsiak buatsaihah hian HSS zirlai eng emaw zat an tel a. Lawmmanah hian thuziak bakah pakhatna tan ₹ 30,000/-, pahnihna tan ₹ 20,000/- leh pathumna tan ₹ 10,000/- te ruahman a ni a. Lawmmante hi June ni 30-a Lawngtlaia Remna Ni lawmna hunah sem a ni ang.

Remna Ni 2023 puala Essay inziahsiak hi District tinah neih a ni a. District level-a a titha thlan chhuahte chu state level a intihsiakna atan State Project Director Samagra Shiksha office-ah thehluh a ni ang a, District tin atanga a titha thlan chhuahte essay ziah atang hian state level-a lawmman dawng turte thlan leh an ni ang. 

Post a Comment

Powered by Blogger.