June 26, 2023, Sangau : Gov't Blue Mountain High School, Sangau Headmaster sawn chhuah duh loh avanga an lungawilohna lantir nan leh headmaster transfer order sut tura sorkar ngiat nan vawiin khan Lai Student' Association, Gov't Blue Mountain High School, Sangau Branch chuan zirtirtute sikul kal tur dangin, sitting demonstration an huaihawt a. Sorkar lam atanga thu thar engmah an hriat loh avangin naktukah an lungawilohna lantir hi an chhunzawm leh ang.
Pu K. Denghmingliana hi inrinni, June 24, 2023 khan Gov't High School, South Vanlaiphaiah transfer a ni. February 2023 ah Gov't Blue Mountain High School, Sangau-ah hian thawk tanin, Headmaster fel leh hnatlin, zirlaite hmakhua ngai taka hnathawk thin a ni a, a ni hnuaiah hian school pawhin hma a sawn hle. Academic Session khat pawh a awm hmaa lak chhuah sak an ni chu pawi an tih thu leh zirlaite rilru a nat thu an sawi.
Lai Students' Association Sub-Hqrs, Sangau chuan LSA Gov't Blue Mountain High School, Sangau Branch ten Gov't Blue Mountain High School, Sangau headmaster Pu K. Denghmingliana sawn chuah duh lohna lungawilohna lantir chu an thlawp tih an sawi a, vawiin sitting demonstration an neih pawh hi an telpui a, naktuka chhunzawm zelna turah pawh Sub-Hqrs. hnuaia branch ten an tawiawm tawh dawn niin an sawi bawk. LSA Sub-Hqrs, Sangau chuan tuna headmaster Pu K. Denghmingliana, Mathematics teacher chu sorkarin a sawn lui a nih chuan he school a chhuahsan hma ngeiin Mathematics teacher hnawhkhah sak turin sorkar an phut thu an sawi a, Gov't Blue Mountain High School, Sangau hi exam center a nih angin post ruak heng; LDC, 4th Grade, Mizo teacher te chu dahsak turin sorkar an phut tih an sawi bawk. An thilphutte hi tun thla chhung ngeia tihhlawhtlin an phut bawk.
Post a Comment