June 24, 2023 (Rauthla) : Gov't Blue Mountain High School, Sangau Headmaster sawn chhuah duh loh avanga an lungawilohna lantir nan leh headmaster transfer order sut tura sorkar ngiat nan Lai Student' Association, Gov't Blue Mountain High School, Sangau Branch chuan thawhtanni, June 26, 2023 hian class kal lovin sitting demonstration an huaihawt dawn.
Lai Student' Association, Gov't Blue Mountain High School, Sangau Branch chuan vawiin khan thuchhuah siamin Government Of Mizoram School Education Department-in June 23, 2023 a Teacher transfer and Posting a tihchhuahah Gov't Blue Mountain High School, Sangau a Headmaster nilai Pu K. Denghmingliana chu hmun dangah transfer a ni. Thuchhuaha tarlan a nih danin, Pu K. Denghmingliana hi February 2023 ah Gov't Blue Mountain High School, Sangau-ah hian thawk tanin, Headmaster fel leh hnatlin, zirlaite hmakhua ngai taka hnathawk thin a ni a, a ni hnuaiah hian school pawhin hma a sawn hle. Academic Session khat pawh a awm hmaa lak chhuah sak an ni chu pawi an tih thu leh zirlaite rilru a nat thu an sawi.
LSA Gov't Blue Mountain High School, Sangau Branch chuan an headmaster hmasa pension hnua hun rei tak headmaster an neih loh hnuah Qualified Headmaster sorkarin a pe chu lawmawm an ti a, amaherawhchu rei pawh a awm hmaa hetia sawn chhuah leh a ni mai hi pawi an tih thu an sawi a. Gov't Blue Mountain High School, Sangaua post ruak tam tak hnawhkhah a nih loh laia a awmsa lak chhuahsak an ni chu an hriatthiam loh thu an sawi a. Headmaster transfer order sut sak turin sorkar an ngen tih an sawi bawk.
Pu K. Denghmingliana hi Gov't High School, South Vanlaiphaiah an transfer a ni.
Post a Comment