May 16, 2023 (Rauthla) : Serchhip khawchhung, Chhiahtlang leh Bukpui inkar, Bukpui dai NH 54 kawngthlang 15mtrs velah tiukin khan ruang chhar a ni a, ruang chhar hi Lalsangzuala (30+) Aizawl Mission Veng tih finfiah a ni a, a lu leh a hmai vel thisenin a bual nasa hle a, mi kut tuar a boral ngei a nih rin a ni.
Tukin zing dar 5 vel khan Chhiahtlang Chhim veng a nupa tuak khat feh kal te chuan kawngpui a thisen lo awm zui mai leh lung, thisen kai an hmu a, thisen awmdan hi kawngpui lai taka intanin kawngthlang lamah a kal thla a, kawng ko ah tam deuh hlek a lo baw leh nuai a, kawng ko atanga an han thlir thlak chuan 15mtrs vela hla ah mipakhat ruang an hmu ta a ni.
An hmuh tirh hian thisen hi a la khang lo niin an sawi. Kawng sir thisen awmna bulah hian Phone, Chapal leh Dispo no ruak leh Minwral water bur ruak hmuh a ni bawk. Rang takin YMA hruaitute an hrilh nghal a, YMA hruaitute hian Police te hrilh ve leh nghalin Serchhip Police SDPO Pu Kaste Romalsawma leh OC Pu Lalramhluna te rang takin an thleng phei nghal a, he thu ziahlai (9:00am) thleng hian ruang hi khawih chet a la ni lova, Aizawl lam atangin Forensic Expert te chah nghalin an lo thlen veleh Postmortem a, chumi hnu ah Aizawl lama phurhthlak tura ruahman mek a ni.
Lalsangzuala hi NHIDCL hnuaia Computer Operator niin Serchhip Kikawn, Sericulture Complex bula an Camp ah a awm thin a. Bolero neiin NHIDCL in an hire sak mek lai a ni nghe nghe. Driver ah Chhiahtlang Chhim Veng a mi Lalramtluanga S/o Lalramzauva a chhawr thin.
Nizan khan Aizawl atangin motor danga lo haw chhovin a driver hian Chhingchhip dai, Thinghmunzawl a NHIDCL Camp atangin a va hruai a, a driver te inah hian zanriah eiin dar 9:30pm velah an mu. Hemi hnu hian a driver Lalramtluanga hian Lalsangzuala chin hi a hre lova, a tuk zing a thawhah a awm lo tih a hre ve chiah niin a sawi a. Chutihlaiin a motor khalh thin Bolero erawh zan an mut dawna a dahna ngaiah lo awm lovin Chhiahtlang Chhim Veng YMA Run ep ah mi thing dahkhawm su chhiain a tlan lawn ur thung a, a khalhtu (te) hian an tlansan a nih hmel.
Lalsangzuala hian a nupui leh an fa sen pakhat a boralsan a ni.
Post a Comment